Моринд хамгийн их халтай спортын төрлүүд

Моринд хамгийн халтай зугаа цэнгэл, спортын төрлөөр коррида буюу бухын тулаан, родео буюу адуу булгиулах тэмцээн ордог.
 Бухын тулааны үеэр морь унасан жадтан буюу пикадор нь улангассан бухны уурыг хүргэн олныг зугаацуулах үүрэгтэй байдаг. Морины хөл бөөрийг тусгай унжуурга, хуягаар хамгаалсан байдаг ч хагас тонн хүртэлх жин татдаг улангассан бух моринд аймшигтай гэмт учруулж, заримдаа бүр шууд үхэлд хүргэдэг. Статистик мэдээнээс үзвэл коррида дээр жилдээ 3-5 мянган морь улангассан буханд мөргүүлэн үхдэг ажээ. Үүний учир нь коррида хамгийн түгээмэл тархсан Португаль, Испани болон Өмнөд Францын тосгон болгон өөрийн корридаг зохион байгуулдгаас ийм олон морь буханд мөргүүлж үхдэг байна.
Адуу гэдэг ухаантай амьтан болохоор улангассан бухны өөдөөс гарахаас аль болох зайлсхийх гэдэг. Тийм болохоор пикадорын унаж байгаа морины нүдийг таглах, хүчтэй мансууруулагч эм өгөн айдсыг нь дарах, маш хүнд бөгөөд хурц өргөс бүхий дөрөөгөөр давиран албадах зэргээр олон хэрцгий арга хэрэглэж иржээ.
Үүнийг ан амьтдын эрхийг хамгаалдаг байгууллагууд маш ихээр эсэргүүцсээр ирсэн ч өнөөг хүртэл корридаг хориглож чадахгүй л байна.
Монголчууд эмнэг адуу сургахыг эр чадал шаардсан жинхэнэ спорт гэж үздэг. Харин америкийн хэдэн ковбой манайд ирээд монгол эмнэг адуу булгихыг хараад бараг шоолоод явсан сурагтай. Яагаад гэтэл тэдний родео дээр булгилдаг морьдын хажууд юу ч биш юм гэнэ. Гэтэл сайн судлаад үзэхээр родео дээр адуу галзуурсан юм шиг булгидаг нь эмнэгтээ бус харин ёс бус гэж болохоор башир арга хэрэглэснээс үүдэлтэй байдаг юм байна.
Тэд адууны цавиар сур оруулаад эмзэг эрхтнийг нь маш хүчтэй дараад татчихдаг юм байна. Арга ядсан амьтан ямар авир гаргах нь тодорхой шүү дээ. Сураар эмзэг эрхтнийг  нь татаж боохын  хажуугаар гараан дээр төмөр хайрцагнаас хурдан гаргахын тулд цахилгаан бороохойгоор цохиулан нэмэлт өвдөлт өгч цочроодог юм байна. Тэгэхээр америкийн родео дээр супер эмнэг адуу гэж нэг ч байхгүй, харин өвдөлтөндөө болоод ухаанаа алдах шахсан хөөрхий амьтад л гардаг ажээ.

 
 
Ингэж албан хүчээр булгиулсны гайгаар родеод оролцсон адууны эмзэг эрхтэн няцрах, задарч урагдах, хүчтэй булгиснаас болоод татсан сур орчмын нугас бэртэх нь хамгийн түгээмэл гэмтэл гэнэ.