​Л.Анхбаатарын хүрэн халзан ​морь түрүүллээ

Тулгар төрийн 2234 жил, Их Монгол Улсын 819 жил, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ой, Үндэсний их баяр цэнгэл наадмын их насны морьд хэдхэн хормын өмнө барианд орлоо.

Уяачийн эрдмийг шалгадаг их насны морьдын уралдаанд газар газраас цугласан хурдан шандаст 210 хурдан хүлэг бүртгүүлснээс сэрвээний өндөр, шүдэлгээгээр нийт 49 морь хасагдаж, 161 морь мордон, 25 км-ын цаанаас эргэсэн билээ.  

Ингээд хурдан шандаст их морины уралдааны түрүү магнайд  Сүхбаатар аймгийн Баруун-Урт сумын уяач Лхагвадоржийн Анхбаатарын хүрэн халзан ирж торгон жолоогоо өргүүллээ.

Аман хүзүүнд Ховд аймгийн Чандмань сумын уугуул Монгол улсын Манлай уяач Батчулууны Ерөөлтийн халтар, айргийн гуравт Төв аймгийн Заамар сумын ууугуул Монгол улсын Алдарт уяач Чалхаагийн Уламбаярын хээр, айргийн дөрөвт Говь-Алтай аймгийн Халиун сумын уугуул Монгол улсын Алдарт уяач Гантөмөрийн Чинзоригийн халтар,  айргийн тавд Баянхонгор аймгийн Баян-Овоо сумын уугуул Монгол улсын Алдарт Цэндийн Энхтайваны хурдан хул морь хурдаллаа.

А.Эрдэнэчимэг