Уралдаанч Б.Энх-Очир: Захаар нь дайрч ороод Нандин хонгор азаргаа түрүүлгэсэн

АХ-ын 103 жилийн ой, Үндэсний их баяр цэнгэл наадмын хурдан азарганы уралдаанд түрүү магнайд хурдалсан Булган аймгийн Гурванбулаг сумын уугуул аймгийн Алдарт уяач Сэрээнэнгийн Гал-Эрдэнийн Нандин хонгор азаргыг унаж хурдлуулсан Төв аймгийн Сэргэлэн сумын харьяат Б.Энх-Очиртой цөөн хором ярилцлаа.

-Монгол төрийн наадамд азарга түрүүлгэсэн авхаалжит хүүд халуун баяр хүргэе. Баярын сэтгэгдэлээсээ хуваалцахгүй юу?

-Баярлалаа. Гоё сэтгэл төрж байна.  

-Нандин хонгорыгоо хэдэн жил унаж байна вэ?

-Хязаалангаас нь хойш унаж байгаа. Хамгийн анх Хэнтийд унасан. Гэхдээ айрагдуулж чадаагүй. Соёолонд нь улсын наадам болоогүй. Сэлэнгийн бүсэд унаад түрүүлгэсэн. Тэрний дараа жил улсад наймлаад, Хөвсгөлд очиж түрүүлсэн.

-Өнгөрсөн жил улсад тун дөхсөн.

-Тэгсэн улсад зургаалаад, Төв аймгийн 100 жилийн ойд аман хүзүүдсэн.

-Өнөө жил сунгаануудад хурдан байсан уу?

-Гайгүй байсан. Энэ жил арай өөр байсан.

-Арай өөр гэдэг нь...

-Туранхайдуу бас хурдан.

-Өглөө мордоход эзэн нь юу гэж захисан бэ? Ер нь түрүүлнэ гэж бодсон уу?

-“Түрүүлээд ирээрэй” гэсэн. Харин би  “уралдаад л үзье” гэж бодсон. Тэгээд дааганы төхөөрөмж дээр 10 гаруйгаар ирээд Цагаан хөтөл өнгөрөөгөөд бага багаар ахиулсан.

-Үзүүрийн уралдаан шимтэй байлаа.

-Захаар нь дайрна даа гэж бодсон. Тэгээд түрүүлсэн.

-Мундаг хүү юм. Азарганаас өөр ямар насны морьд унасан бэ?

-Хязаалан, шүдлэн унасан.Шүдлэнгээсээ унаад, үрээ маань дөрөвт давхисан. Соёолон бас унана.

-Зам хэр байна вэ?

-Энэ жил гайгүй байна шүү.

-Энх-Очир энэ жил хэдэн настай вэ?

-10 настай. Намар тавдугаар ангид орно.

-Дараа дараагийн уралдаанд нь амжилт хүсье.

-Баярлалаа. 

А.Тэлмэн