Говьсүмбэр аймгийн МСУХ шилдгүүдээ тодруулжээ

Сэтгүүлч
2019 оны 12-р сарын 27 -нд

Говьсүмбэр аймгийн МСУХ-ны шинэ жилийн цэнгүүн 2019 оны 12 дугаар сарын 20-нд болж, гурван сумын төлөөлөл 120 уяач, урилгаар хурдан морь тайлбарлагч Б. Ганпүрэв, дуучин МУСТА А.Мөнхбат, Нарантуяа нар оролцжээ. Баярын цэнгүүний үеэр уламжлал ёсоор оны шилдгүүдээ шалгаруулсаны зэрэгцээ нэр бүхий уяачдад ММСУХ-ны болон аймгийн МСУХ-ны шагналыг гардуулж, сугалаагаар азтанг тодруулсан байна.

Үүнээс гадна Говьсүмбэрчүүд 2020 онд “Уяачдын ордон”-той болох зорилт дэвшүүлж, уяачдаасаа хандив цуглуулах арга хэмжээг зохион байгуулсан ба нийт 103 сая төгрөгийн бэлэн мөнгө болон мал, үнэ бүхий зүйлээр хандив өргөжээ.

Ийнхүү ирэх жил шинэ ордонтой болох Говьсүмбэр аймгийн уяачид, хурдан морины зүтгэлтнүүдийг 2019 онд хэн хошуучилсаныг одоо танилцуулъя.

Шилдэг хүлгүүд:

Азарга: Шивээговь сумын харьяат, аймгийн Алдарт уяач Г. Адъяасүрэнгийн буурал

Их нас: Сүмбэр сумын харъяат залуу уяач Д. Баттулгын хул

Соёолон: Сүмбэр сумын харъяат сумын Алдарт уяач П. Эрдэнэзаяагийн зээрд халзан


Хязаалан: Сүмбэр сумын харъяат О.Ягаанаагийн хонгор

Шүдлэн: Сүмбэр сумын харъяат Х.Ганхуягийн хул

Даага: Шивээговь сумын харъяат Л.Амаржаргалын хонгор


Эрлийз дээд: Сүмбэр сумын харъяат Д.Төрмөнхийн бор азарга

Эрлийз дунд: Сүмбэр сумын харъяат, сумын Алдарт уяач Х.Манлайбаатарын зээрд

Эрлийз бага: Сүмбэр сумын харъяат аймгийн Алдарт уяач Ц.Мөнхбатын бор тус тус шалгарчээ.

Харин шилдэг уяачаар “Боржигон хийморь” галын гишүүн Д.Баттулга, шилдэг галаар “Боржигон хийморь” гал шалгарсан байна.

Б.Хастөр

1 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.