Уралдаанч Б.Дөлгөөн: Монгол хүн болгоны адил би морь унаад давхих дуртай

АХ-ын 97 жилийн ойн баяр наадмын эрлийз дунд насанд үрээгээ айргийн дөрөвт хурдлуулсан уралдаанч Баярмаагийн Дөлгөөнтэй уулзан баярын сэтгэгдэл хуваалцлаа. Хоймор нутгаас төрийн баяртаа ирж уралдсан тэрээр энэ жил 13 настай. 

- Баяр хүргэе. Эрлийз дунд насанд морио айрагдуулчихлаа шүү дээ.  
- Баярлалаа. Сэтгэл маш өндөр байна. Газар газрын энэ олон морьдоос илүү гарч айрагдана гэдэг том амжилт. Үрээгээ айрагдана гэдэгт итгэлтэй уралдаад, санасандаа хүрлээ.  
 - Мордохын өмнө уяач нь юу гэж захисан бэ?
- Тархины мориноос битгий хоцроорой, хоцорвол айрагдахгүй шүү гэсэн.  
 - Хэдэн насны морь унаж хурдлуулсан бэ? 
- Гурван насны морь уналаа. Азарга 20, их морь 66-гаар давхиулан, эрлийз хүрэн халзан үрээгээ айргийн дөрөвт хурдлууллаа. 
- Аль аймгаас улсын баяр наадмаа зорин ирсэн бэ? 
- Хөвсгөл аймгийн Мөрөн сумаас ирж, улсын наадамдаа анх удаа уралдаж байна. 
 - Төрийн их баяр наадам юугаараа онцлогтой байна вэ? 
- Улсын наадмын онцлог гэвэл зам нь хадгүй, их олон морь уралддаг юм байна. Олон морьтой уралдахаар гоё юм аа. Морь унаад таван жил болохдоо зөвхөн Хөвсгөл аймагтаа л уралдаж байлаа. 
-  Хэн чамайг морь унахад нөлөөлсөн бэ? Эсвэл танай гэрт хурдан хүлгийн уяа тааруулдаг хүн байна уу?
- Монгол хүн болгон морь унах дуртай шиг би ч бас морь унаад давхих дуртай. Манай хүргэн ах морь уядаг юм. Надад морь унахыг энэ хүн зааж өгсөн. Хүргэн ахынхаа уясан морийг унаад айрагдуулж байсан. Одоо Батбаяр ахынхаа морийг унаж байгаа.  
 - Миний дүү аль сургуулийн хэддүгээр ангид сурдаг бэ?
- Хөвсгөл аймгийн Мөрөн сумын Дэлгэрмөрөн цогцолбор сургуульд сурдаг. Намар долоодугаар ангид орно. 
- Ярилцсанд баярлалаа. Унасан морьдоо үргэлж айраг, түрүүнд хурдлуулаарай. 

А.Энхжил

Тод магнай сэтгүүл №100, 2018 он