Хоёр Тод манлай, найман Манлай шинээр төрлөө

"Тийн унжлагат" хэмээх шороон нохой жилийн сар шинийн босгон дээр хоёр Тод манлай, найман Манлай уяач шинээр төрлөө. Морь уях төрийн их хэрэгт шамдан суралцаж,  адуун өв соёлыг өөрийн биеэр үлгэрлэн, үр хойчдоо өвлүүлэн үлдээх үйлсэд хүчин зүтгэж буй уяачдын хөдөлмөр зүтгэлийг үнэлж, төрийн тэргүүн сар шинийн босгон дээр алдар цолыг нь гардуулдаг уламжлалтай. Өнөө жилийн хувьд Хөвсгөл аймаг анхны Тод манлай уяачаа, харин Завхан нутаг тав дахь Тод манлай уяачаа хүлээн авсан юм. Түүнчлэн Тод манлай уяач, Гавьяат малчин Д.Ононгийн отгон хүү ЗХ-ний 232-р ангийн уяач О.Батболд Манлай уяач цол хүртэн, нэгэн гэр бүлээс хоёр Тод манлай, нэг Манлай уяач төрсөн бол Төв аймгийн Баянцогт сумаар овоглодог Сумъяасүрэн агсны хөвгүүд болох ах дүү уяачид Тод манлай /С.Ганхуяг/, Манлай  /С.Ганбаатар/, Алдарт /С.Ганзориг/ гурвуул  улсын цолтой болж Монголын хурдан морины түүхэнд бас нэгэн шинэ түүхийн эзэд болцгоолоо.
Өнөө жил “Дорнын унага” гал уяанаас хамгийн олон улсын цолтнууд мэндэлсэн бөгөөд  Т.Галбадрах Тод манлай,  Б.Цэндбаатар, Т.Батзориг, С.Ганбаатар, Г.Мөнхсайхан нар Манлай, Н.Баасанжав Алдарт уяач цол тус тус хүртжээ. Мөн Архангай аймгийн  Эрдэнэбулган сумын уугуул Гончигжавын Мөнхсайхан аймгийн Алдартаас Манлай уяачийн цолонд  хүрч, олон жилийн  хөдөлмөрөө үнэлүүллээ.
Ингээд та бүхэндээ шинэхэн Тод манлай, Манлай  уяачдыг танилцуулъя.
Тод манлай уяач цолтноор:
1.Хөвсгөл аймгийн Тариалан сумын харьяат, МУ-ын Манлай уяач Гордоогийн Доржпүрэв.
2.Завхан аймгийн Тосонцэнгэл сумын уугуул, МУ-ын Манлай уяач Төмөрбаатарын Галбадрах. 
Манлай уяач цолтноор:
1.Дорнод аймгийн Матад сумын харьяат, МУ-ын Алдарт уяа Бат-Очирын Цэндбаатар.
2.Архангай аймгийн Эрдэнэбулган сумын уугуул Гончигжавын Мөнхсайхан.
3.Төв аймгийн Баян сумын уугуул, МУ-ын Алдарт уяач Пунцагбалжирын Энхмөнх.
4.Дундговь аймгийн Сайнцагаан сумын уугуул, МУ-ын Алдарт уяач  Пэлжээгийн Одонбаатар.
5.Дорнод аймгийн Цагаан-Овоо сумын харьяат, МУ-ын  Алдарт уяач Түвдэнжаажидын Батзориг.
6.Дорнод аймгийн Баянтүмэн сумын харьяат, ЗХ-ний 232 дугаар ангийн уяач, МУ-ын Алдарт уяач Ононгийн Батболд.
7.Говь-Алтай аймгийн Жаргалан сумын уугуул, МУ-ын Алдарт уяач Анандын Ариунсайхан.
8.Төв аймгийн Баянцогт сумын уугуул МУ-ын Алдарт уяач Сумъяасүрэнгийн Ганбаатар

У.Энхмаа