Улсын начин Г.Батбаатар: Миний саарал үрээ морин тойруулгын цустай адуу

- Ардын хувьсгалын 96 жилийн ой, үндэсний их баяр наадамд аз хийморийн бэлгэдэл соёолон насны үрээ тань түрүүллээ. Халуун баяр хүргэe. Монгол төрийн наадамд хэд дэх жилдээ морь мордуулж байгаа вэ?
-Баярлалаа. Миний хувьд монгол төрийн наадамд тав дахь жилдээ морь мордуулж байна.
- Өмнөх жилүүдэд мордуулсан морьд тань хэдээр давхиж байв?
-Гурван жилийн өмнө эрлийз дунд насанд хээр үрээ дөрөвлөсөн. Ноднин жил саарал үрээ есөөр давхиад, Эрдэнэт болон “Дүнжингаравын хурд” уралдаануудад тус тус түрүүлсэн амжилттай.
- Энэ жил хэдэн насны морьд мордуулав?
-Хоёр соёолонтой ирсэн. Хээр соёолон 27-гоор давхилаа.
- Та “Унаган хурд” галын гишүүн гэж явдаг байх аа?
-Тиймээ, 2010 онд анх энэ галын гишүүн болсон.
- “Унаган хурд” гал сүүлийн хоёр жил дарааллан соёолонгийн түрүү хүртлээ. Таны хувьд галынхаа амжилтын буухиаг үргэлжлүүлж байгаагаа бэлгэшээж л байгаа байлгүй?
-Тийм. Миний саарал үрээ Манлай уяач Одгэрэлийн унаган адуу байгаа юм. Тодруулбал, би тэднийхээс нэг гүү авч, Тормог гэдэг азарганд тавьсанаар гарсан юм. Дээд угшил нь морин тойруулгын цустай.
- Уяачид “Тод манлай уяач Одгэрэл адууг хаахнуур давхихыг нь төвөггүй хэлдэг” гэлцдэг. Таны саарал үрээний тухайд ямар нэгэн юм хэлсэн үү?
-“Ер нь дээгүүр давхих байх аа” л гэж байсан. Би ч бас айргийн тавд багтчих болов уу гэсэн бодолтой л байлаа. Тэгээд уралдаанаа зурагтаар харж байхад түрүүлэх магадлал өндөрсөөд л ирсэн дээ. Саарал маань ер нь нэг гараад явчихвал суудаггүй адуу л даа.
- Та бол бөх хүн. Барилдаад улсын цол авах, морь уралдуулаад түрүү хүртэх хоёрын аль нь таны сэтгэлийг илүү хөдөлгөж байна вэ?
-Ер нь адилхан даа.  Хоёуланд нь л сэтгэл их хөдөлдөг юм байна.
- Та ингэхэд анх ямар учир шалтгаанаар морьтой холбогдсон бэ. Өвөг дээдэс тань морины уяа эвлүүлдэг хүмүүс байсан юм уу?
-Манай аав морь уядаг хүн байсан л даа. Архангай аймгийн наадмаас их насны морь болон соёолонгийн  түрүү хүртэж байсан түүхтэй. Би ч багаасаа хурдан морь унасан.
- Танай тийшээ наадмаа их насны морины түрүүгээр хэмждэг. Энэ ч утгаараа аав тань мундаг уяач байжээ.  Аавын тань оролцож байсан хамгийн өндөр чансаатай уралдаан нь ямар уралдаан байсан юм бол?
-Дээхнэ үеийнхэн нутагтаа л нааддаг байлаа шүү дээ. Аав маань ч бас сумандаа болон аймагтаа л нааддаг байсан.
- Галбадрах уяачийн хүүхдүүдээс одоо хэд нь морь уяж байна вэ?
-Манай том ах аймгийн Алдарт уяач цолтой. Бид хоёр л уяж байна даа.
- Та бүсийн наадмаас нийт хэдэн айраг, түрүү хүртсэн бэ?
-Хамгийн сүүлд ноднин саарал үрээ маань бүсийн уралдаанд дөрөвлөсөн. Ингээд нийт хоёр түрүү, нэг айрагтай болсон доо. Энэ жил бүсийн наадмуудад морьд мордуулсангүй.

А.Тэлмэн