Уяач С.Мөнхнасан: Есөн жилийн хөдөлмөрөө үнэлүүлж азаргаа айрагдуулсандаа баяртай байна

-Төрийн их баяр цэнгэл наадамд адуун сүргийн манлай азарга айрагдуулсан танд баяр хүргэе. Баяр наадмынхаа сэтгэгдлээс хуваалцаач?
-Сайхан байна.Төрийнхөө баяр наадамд азарга айрагдуулна гэдэг хүн болгонд тохиох завшаан биш. Энэ ховор тохиолын эзэн болж төрийнхөө наадмаас хишиг хүртсэндээ баяртай байна. Энэ дашрамд миний төрсөн нутаг Говь-Алтай аймгийн Дарив сумын зон олон болон  Төв аймгийн Алтанбулаг сумынхандаа баярласан талархсанаа илэрхийлж, баярын мэнд дэвшүүлье.
Миний бор азарга бол Төв аймгийн Баян-Өнжүүл сумын харьяат аймгийн Алдарт уяач Мөнхбат гэж хүний унаган адуу.Ийм сайхан хурдан буян хайрласан Мөнхбат ахдаа бас баярласнаа илэрхийлмээр байна.
-Хэдэн настай азарга вэ? Өмнө нь ямар амжилт үзүүлж байсан бэ?
-Хавчиг азарга. Ноднин Говь-Алтай аймгийн Дарив сумынхаа 90 жилийн ойд очиж азарганд уралдуулаад айрагдуулсан. Түүний дараа Говь-Алтай аймагт болсон баруун бүсийн уралдаанд зургаагаар давхисан.Өнөө жилийн тухайд дан уяагаар улсын наадамдаа мордож байгаа нь энэ.
-Та хэдтэй азарга авч байсан юм бэ?
-Намар хязаалан үрээ авсан. Шүдлэндээ Төв аймгийн баяр наадамд гурваар давхиад, хязааландаа Баян-Өнжүүл сумын наадамд түрүүлж, Хархоринд болсон бүсийн уралдаанд 11-ээр давхисан юм билээ.
-Хэдэн насны морьтой ирсэн бэ?
-Ер нь бол зургаан насны морь уясан. Цаг агаарын нөхцөл уяа сойлгын байдлаас шалтгаалж
азарга, их морь л мордуулж байна..
-Төрийн наадамд хэд дэх жилдээ оролцож байгаа вэ? Өнөө жилийн баяр наадмын талаарх сэтгэгдлээсээ хуваалцаач?
-2011 оноос хойш төрийнхөө наадамд оролцож байна.Өнөө жилийн баяр наадмын зохион байгуулалт их сайн байна. Жинхэнэ монгол адуу уралдсан сайхан наадам болж байгаад баяртай байгаа. Өвөг дээдсээс өвлөгдөж ирсэн өв соёлоо хадгалж явах нь өнөө цагийн бидний үүрэг. Тэр үүргээ биелүүлж үндсэн дэг жаяг, зан заншлаа хадгалахаар хичээж буй нь сайшаалтай юм.
-Улсын баяр наадмын анхны хишиг үү?
-Тиймээ. Түүнээс өмнө  2011 онд Дундговь аймгийн 70 жилийн ойд хязаалан айрагдуулж байсан.
-Танайхны дээдчүүл морь уях төрийн хэрэгт оролцож байв  уу?
-Өвөг дээдэс маань бүгд морь уяж байсан. Би 10-н жилээсээ эхлэн морь уяж байгаад нэг хэсэг завсарласан. Тэгээд 2008 оноос дахин морь уяж байгаа. Өнөөдөр есөн жилийн хөдөлмөрөө үнэлүүлж азаргаа айрагдуулсандаа баяртай байна.
-Ярилцсанд баярлалаа. Дараа дараагийн уралдаанд нь амжилт хүсье.

Б.Эрдэнэсүрэн