Москвад Монгол морины хөшөө бослоо

Дэлхийн Хоёрдугаар дайны үед Зөвлөлтийн Улаан армид Бүгд Найрамдах Монгол Ард Улсаас тусламж болгон бэлэглэсэн монгол адуунд зориулсан хөшөөний нээлт Баасан гарагт Москвагийн ойролцоох Поклонная ууланд оршдог Ялалтын цэцэрлэгт болсон юм.
Аугаа Эх орны дайн дууссаны түүхт 70 жилийн ойгоор уг хөшөөг Монголын засгийн газраас ОХУ-д бэлэглэж байсан юм. Их буу чирч яваа хоёр морины дүр бүхий хөшөө нь эх орны дайны ялалтад Монголын ард түмний оруулсан хувь нэмрийг илэрхийлж байгаа ажээ.
Хөшөөний нээлтийн ажиллагааг Оросын Россия-1 суваг сурвалжлан дамжуулсныг хүргэж байна.
Нээлтийн ажиллагаанд ОХУ-ын гадаад хэргийн дэд сайд Григорий Карасин оролцсон бол Монголын талаас гадаад хэргийн сайд Ц.Мөнх-Оргил, элчин сайд Б.Дэлгэрмаа зэрэг албаны хүмүүс оролцсон байна.
Дайны үеэр Монголчууд нийтдээ хагас сая орчим адууг худалдах, бэлэглэх замаар Зөвлөлтийн улаан армид нийлүүлсэн гэсэн тоо бий.
Хөшөөг босгоход Монголын барималч Аюурзанын Очирболд, Оросын архитектор Алексей Тихонов, Василий Перфильев нар хамтран ажиллажээ.