Шилдгийн шилдэг уралдаанч М.Цагаанцоож: 2014 оны наадмуудаас 27 айраг, түрүү авсан

Увс аймгийн Ховд сумын уугуул, шилдгийн шилдэг уралдаанч М.Цагаанцоож хүүгийн яриаг уншигч танаа хүргэж байна.
-Сумынхаа 2013 оны шилдэг, 2014 оны шилдгийн шилдэг уралдаанчаар шалгарч байсан юм. Шилдгээр шалгарсан онуудад хэрхэн наадсан бэ?
-2013 онд суманд болсон хаврын бооцоот уралдаанд хар азаргаа түрүүлгээд, Баян-Өлгий аймагт болсон  Наурызын баярт очиж Үүлэн бороо тавлуулсан. Тэр зунаа сумынхаа наадамд Алтан ахын бор хээр соёолон, хонгор морь хоёрыг түрүүлгээд, Ховдын Дөргөнд очиж бор хээрийгээ дахин түрүүлгэж, Мянгадад Чонон саарлыгаа аман хүзүүдүүлсэн. Намар нь харцагын баяр болж тэнд нэг морь аман хүзүүдүүлж, нөгөөг нь таваар давхиулан 2013 онд нийт 21 айраг, түрүү авсан.
-Тэгвэл 2014 онд?
-2014 онд сумдын ой болон аймгийн баяр наадам гээд нийт 27 айраг, түрүү хүртэж шилдгийн шилдэг унаач болсон.
-27 айраг ,түрүү гэхээр их олон газар нааджээ дээ?
-Сумынхаа 90 жилийн ойд Алтан ахын хээрийг унаж түрүүлгээд, Өмнөговийн 90 жилд очиж хонгорыгоо түрүүлгэж, хээрийгээ гуравлуулсан. Түүний дараа Бөхмөрөн сумын 90 жилийн ойд очиж хээрийгээ дахин  түрүүлгэсэн. Мөн Алтанцөгц сумын хаврын уралдаанаас нэг түрүү, нэг аман хүзүү авсан.
-Хөх азарга унаж хурдлуулсан гэсэн?
-Тэгсээн. Хөх азаргаа Өлгий, Мянгад суманд очиж таваар давхиулсан. Бас Дөргөний наадамд хээрийгээ унаж түрүүлгэсэн. 2014 онд манай суманд Батсуурь Арслангийн мялаалга наадам болж хээр хязаалан соёолонд уралдаж аман хүзүүдээд, хөх азарга таваар давхисан. Мөн багийн ойд бор хээрийгээ түрүүлгэж, хонгор морийг аман хүзүүдүүлсэн. Би бор хээрийг шүдлэн цагаас нь эхэлж унасан.
-Хонь жил гарсаар яаж наадав?
-Ховд аймгийн Чандмань суманд болсон уралдаанд их насны морь түрүүлгэж, соёолон түрүүлгэсэн.
-Энэ жил 14 хүрч байгаа юм байна. Хэдэн настайгаасаа эхэлж хурдан морь унасан юм бэ?
-Зургаан настайгаасаа эхлээд хурдан морь унасан. Анх аавынхаа уясан морьдыг унадаг байлаа. Соёолон морь Бөхмөрөн сумынхаа 80 жилийн ойд таваар давхиулж, хаврын бооцоот уралдаанд хар азаргаа аман хүзүүдүүлсэн.
-Өөр аймагт уралдаж үзэв үү. Ер нь хамгийн холдоо хаана очиж наадсан бэ?
-Завхан аймагт болсон даншиг наадамд хээр морио 32-оор давхиулж, 2011 оны Увс аймгийн даншигт өөрийнхөө болон Алтан, Мөнхөө зэрэг ах нарын морьдыг унаж 20 хэдээр давхиулсан. 2012 онд Баян-Өлгий аймагт болсон баруун бүсийн наадамд Мөнхөө ахын хоёр морийг унасан.
-5-р сарын 2-нд болсон аймгийнхаа төвийн бүсийн уралдаанд азарга унасан уу?
-Хөх азаргыг би унаагүй ээ, манай дүү унасан. Мягмарсүрэн гэдэг юм. Энэ жил 10 настай. Өмнө нь Өлгий сумын наадамд Мөнхөө ахын морийг унаж тавлуулж байсан юм.
-Хурдан морь унахын сайхан нь юу вэ?
-Монголчууд дээр үеэсээ морин дэл дээр өссөн гэж бодохоор сайхан байдаг.
-Ирээдүйд ямар мэргэжилтэй болохыг хүсдэг вэ?
-Барилгын инженер. Би сурлагадаа сайн.
-Хамгийн сайхан наадмын дурсамжаасаа хуваалцаач?
-Сумынхаа 90 жилийн ойд унасан морио түрүүлгэж, айрагдуулсандаа их баярладаг даа.
-Ярилцсанд баярлалаа. Амжилт хүсье.
"Тод магнай" сэтгүүл Увс аймгийн тусгай дугаар