“Дулааны хурд” уяачдын холбооны тэргүүлэгч Ө.Доржпүрэв: Удамтай адууны хурд тасардаггүй юм билээ

Дорноговь аймгийн Сайхандулаан сумын уугуул, “Дулааны хурд” уяачдын холбооны тэргүүлэгч Ө.Доржпүрэвтэй хийсэн ярилцлагыг уншигч танаа хүргэж байна.
-“Дулааны хурд” МСУХ могой жилийг ямар амжилтаар үдээд байна вэ?
-Улиран одож буй могой жилийг манай уяачид амжилт дүүрэн үдэж байгаа. Миний хувьд  уяачдынхаа холбооны тэргүүлэгч гишүүнээр гурав дахь жилдээ ажиллаж байна. Засаг дарга Баасанжав, орлогч дарга Батцэнгэл нарын тэргүүлдэг манай “Дулааны хурд” уяачдын холбоо нь нэг удаагийн “Мөнгөн морь”, хоёр удаагийн “Хүрэл азарга”-ны цомын эзэд. Холбооноос сумынхаа уяачдаа дэмжих, уяачдын хүрээг тэлэх, наадмыг зохион байгуулалттай явуулахад анхаарлаа хандуулан ажиллалаа. Ямартаа ч  аль нэг уралдаан наадамд зохион байгуулалтын тал дээр санал гомдол гарахаа больсон гэж болно. Өнгөрсөн наадмаар гэхэд уралдааны замд мотоцикль дагаж замбараагүй байдал үүсдэг явдал гараагүй. 2014 онд тохиох 90 жилийн ойгоо тохиолдуулан зохион байгуулалтын ажлаа одооноос эхлүүлээд байгаа нь энэ. Мөн унаач хүүхдүүдээ 100 хувь даатгалд хамруулж байгаа. Ирэх жил иж бүрэн хамгаалалтын хувцастай уралдуулахаар боллоо.
-Таны хувьд хурд ирлэж, уяа сойлго тааруулах болсон үе хэзээ вэ?
-Миний ээж, аав малчин улс байлаа. Гэхдээ аав морь уяж байгаагүй л дээ. Миний хувьд хүргэн ахыгаа дагаж морь мал гэж гүйсээр уяаны эрдэмд шимтэх болсон юм. Ах маань цаг бусаар бурхны оронд явж, би хойчийг нь залгамжлан морь уях болоод 17 жил өнгөрчээ. Бие даан морь уяад нэг жилийн дараа буюу 1998 онд анхны айргаа амсаж байлаа. Бүрхэг хэмээх Намжилваанчигийн хөшөөний нээлтэнд Баянмөнхийн хээр гэж хурдан азарганы төл хээр азаргыг айргийн гурваар давхиулж, даагаа дөрөвлүүлж байв. Бас л азтай хэрэг шүү. Анхны айргаа ихэрлүүлнэ гэдэг. Ийнхүү хурдан тууртын сүлд хийморь ивээж, анхны амжилтаа гаргаснаас хойш сайхан л наадаж байна.
-Түүнээс хойш ямар, ямар амжилт гаргаад байна вэ?
-Сумын Алдартын болзолд тун дөхөж байгаа шүү. Арван хэдэн айраг, бага наадамтайгаа нийлээд тав, зургаан түрүү бий. Эндээс  сонирхуулахад бага овооны наадамд хоёр ч удаа соёолон түрүүлгэлээ. Бас их морь түрүүлгэж, аман хүзүүдүүлж үзлээ. Есдүгээр сарын нэгэнд хоёр жил дараалан даага айрагдуулсан. Баян ходоодыг нь ч авч байсан удаатай. Сүүлийн сонин гэвэл энэ жил /2013 он/ сумынхаа наадамд азарга түрүүлгэсэн нь илүү их урам зоригийг бадраасан шүү.
Хурд ирлэсэн энэ хугацаанд миний саарал соёолон, хурдан хээр азарга, хоёр хээр морь олон удаа уяачийн баяр жаргалыг мэдрүүлсэн дээ. Хоёр хээрийн нэг нь хоёр аман хүзүүдэж, хоёр айрагдан, тахилга, сумын наадамд зургаалж байлаа. Саарал соёолон гэхэд гурван удаа айрагдсан. Эх нь Гүнд-Ухны Далигаа хурд азарганы угшилтай. Харин эцэг нь Баянмөнхийн хээрийн удамтай морь байлаа. Дүү нь ноднин хаврын жижиг наадамд түрүү магнайд хурдалсан. Үнэхээр удамтай адууны хурд тасардаггүй юм билээ. Сүүлийн үед Хэнтий чигийн адуугаар наадаад байна. Хүргэн ахынхаа бэлэглэсэн хонгор халзан азаргыг сумын наадамдаа түрүүлгэлээ, 2013 онд. Уржнан хар соёолон суманд зургаалуулж, овооны наадамд түрүүлж, Хамрын хийдэд аравлалаа.
-Сумандаа л наадаад байна уу?
-Тийм ээ. Тэр бүр хол явж чадахгүй л байна. Хамгийн холдоо Өмнөговь аймгийн Ханбогдод очсон. Дэмчигийн хийдийн суварганы наадамд хар соёолон 15, 16-аар орсон.
-Бидний яриа өндөрлөж байна. Ярилцсан танд баярлалаа.
-“Тод магнай” сэтгүүлээр дамжуулан нутгийн зон олондоо эрүүл энх, энэ хорвоогийн хамгийн сайн сайхан бүхнийг хүсэн ерөөе.

"Тод магнай" сэтгүүл Дорноговь аймгийн тусгай дугаар