Ш.Бадамжунайн хүрэн халзан

Сайн хүлэг эзнээ алдаршуулдгийн бас нэгэн илэрхийлэл болсон бахдам хурдан хүлэг бол Архангай аймгийн Өндөр-Улаан сумын харьяат, аймгийн Алдарт уяач Шаравжамцын Бадамжунайн хүрэн халзан азарга юм. Арын хангайн босоо хүлгүүдийн нэг болсон халзан азарга өнгөрсөн жил “Дүнжингаравын хурд-2015” хаврын бүсийн уралдаанд айргийн гуравт хурдлан том наадмын өм нээж, Өндөр Гэгээн Занабазарын мэлмий гийсний 380 жилийн ой, хангайн бүсийн уралдаанд түрүүлэн хурдан морь сонирхогчдын танил болсон билээ. Ингээд залуу уяачийн хийморийг өргөн сүүлийн жилүүдэд тогтмол амжилттай наадаж буй хүрэн халзан азарганы талаар товч танилцуулъя.
Удам, угшил:
УИХ-ын гишүүн Г.Тэмүүлэнгийн унаган адуу. 2011 онд Ш.Бадамжунай есдүгээр ангийн сурагч ахыгаа даган ирэхэд нь Г.Тэмүүлэн хүрэн халзан хязаалан бэлгэнд өгч байжээ. Халзан үрээ хязаалан  цагаас эхлэн уягдаж,  өнөөдрийн байдлаар 30-аад удаа түрүүлж, айрагдаад байгаагийн нэг түрүү, гурван айраг нь төрийн зарлигт наадмын амжилт юм.
Эцэг: Хэнтий аймгийн Өлзийт тосгоны харьяат Шаарийбуугийн унаган шарга халзан азарга. Шүдлэндээ Хэнтий аймгийн баяр наадам, Сүхбаатар аймгийн Уулбаян сумын ойд тус тус түрүүлж, хязааландаа улсын баяр наадамд арваар давхиж байсан.
Эх: Тойруулга угшилтай зээрд гүү.
Амжилтйн товчоон:
2011 онд хязаалан:
Өндөр-Улаан сумын баяр наадамд зургаа
Багийн өдөрлөгт айргийн тав
2012 онд соёолон:
Өндөр-Улаан сумын баяр наадамд түрүү
Батцагаан овооны тахилга уралдаанд түрүү
Баянгол овооны тахилга уралдаанд түрүү
“Архангай аймгийн шигшмэл хурд“ уралдаанд 30-аадаар
2013 онд хавчиг:
Батцагаан овооны тахилга уралдаанд айргийн гурав
Баянгол овооны тахилга уралдаанд түрүү
Өндөр-Улаан сумын 90 жилийн ойн баяр наадамд ес
Ургын баярт түрүү
2014 онд долоотой:
Нуурын овооны тахилга уралдаанд түрүү
Батцагаан овооны тахилга уралдаанд түрүү
Цахир сумын Очир хайрханы тахилга уралдаанд түрүү
Архангай аймгийн баяр наадамд түрүү
Архангай аймгийн Чулуут сумын 90 жилийн ойн түрүү
“Архангай аймгийн шигшмэл хурд-3” уралдаанд түрүү
2015 онд наймтай:
 “Дүнжингаравын хурд-2015” хаврын бүсийн уралдаанд айргийн гурав
Архангай аймгийн баяр наадамд түрүү
Архангай аймгийн Эрдэнэмандал сумын 90 жилийн ойд түрүү
Өндөр Гэгээн Занабазарын мэлмий гийсний 380 жилийн ой, хангайн бүсийн уралдаанд түрүү
ММСУХ-ны 20 жилийн ойд найм
2016 онд естэй:
“Дүнжингаравын хурд-2016” хаврын бүсийн уралдаанд 16
Өвөрхангай аймагт болсон хаврын бүсийн уралдаанд айргийн дөрөв
АХ-ын 95 жилийн ой үндэсний их баяр наадамд найм
Шигшмэл морьдын “Их хурд-7” долоо
Хангайн бүсийн уралдаанд айргийн гурав
“Архангай аймгийн шигшмэл хурд-4” уралдаанд түрүү
А.Энхжил