“Очирваанийн хүлэг” МСУХ-ны тэргүүлэгч Д.Цолмон: Хүрэн морь маань хорь гаруй айраг, түрүүтэй болоод байна

Завхан аймгийн Эрдэнэхайрхан сумын уугуул, аймгийн Алдарт уяач, “Очирваанийн хүлэг” МСУХ-ны тэргүүлэгч Д.Цолмонтой хийсэн ярилцлагыг уншигч танаа хүргэж байна. 
-“Очирваанийн хүлэг” МСУХ-ны удирдлагын багт ажиллахаар болсон юм байна. Анх удаа тэргүүлэгчээр сонгогдож байна уу?
-Тиймээ. “Очирваанийн хүлэг” МСУХ-ны ээлжит бага хурал хуралдаж, бүтэц зохион байгуулалтын өөрчлөлт хийн, тэргүүн болон удирдлагын багаа шинэчиллээ. Миний бие анх удаагаа тэргүүлэгчээр сонгогдлоо.
-Моринд сэтгэлтэй эрхмүүд тэргүүлэгчийн албыг хашдаг шүү дээ. Таны хувьд хэзээнээс хурдан морьтой холбогдсон бэ?
-Би харьцангуй шинэ уяач. 2011 оноос морь уяж байгаа. Цэцэн-Уул сумын харьяат Ганзориг гэж залуу миний морьдыг уядаг. Манай адуу Алдархаан сумын дээхнэ талд хоёр Хайрханы орчимд л байдаг юм. Төвийн уяачид шинэ цагийн уяаны арга барилд нийцүүлэн жүчээ барьж өвөлдөө морьдоо голдуу тэжээж байна. Манайхны уяачид нийлээд зарим өвөл дөч гаруй адуу тэжээнэ шүү дээ.
-Морь уясан цагаас хойш ямар амжилт гаргасан бэ?
-Миний хүрэн морь, бор азарга хоёр маань сайн давхиж байгаа. Хүрэн морь аймгийн наадамд соёолондоо аман хүзүүдэж, тэр жилээ Алдархааны 90 жилийн ойд гурвалсан. Мөн Эрдэнэхайрханы 60 жилийн ойд аман хүзүүдээд жижиг наадамд хэд, хэд орсон. 2011 оноос хойш том, бага наадмаас 24, 25 айраг, түрүү хүртсэн байна лээ. Түүнээс аймгийн баяр наадмын нэг түрүү, нэг айраг, аймгийн бүсийн наадмын нэг түрүүтэй.
-Аймгийнхаа 90 жилийн ойд хэрхэн наадсан бэ?
-Гурван морь  мордуулсан ч сайхан давхиулсаан. Моринд хорхойсох сэтгэлийг дэврээж буй хүрэн морь маань Хэнтий аймгийн адуу. Манай уяач Ганзориг худалдаж авч ирсэн юм. Залуу хүн гэхэд морь сайн танина, сайн ч уяна.
-Тэгвэл бор азарга тань?
-Сүхбаатар аймгийн Асгат сумын адуу. Хүрэн морь, бор азаргыг хамт авчирсан  юм. Бор азаргандаа Алдархааны хоёр гүү хураалгаж байгаа. Ирэх жилээс төл авах байх. Сүүлийн үеийн уяач учраас голдуу авмал адуугаар л наадаж байна даа.
-Модон морин жил гарсаар та хэр наадав? Хаврын уралдаануудад оролцов уу?
-Морин жил гарсаар урд бүсийн наадамд очиж нэг түрүү авсан. Хаврын уралдаанууд өндөрлөж байна. Зун сайхан уралдах байхаа.
-Ерөөлөөр болог. Уясан хүлэг тань хурдан байж, тод магнай торгон жолоогоо өргүүлж явахыг ерөөе. Ярилцсанд баярлалаа.
-Ерөөлөөр болог.
"Тод магнай" сэтгүүл Завхан аймгийн тусгай дугаар, 2014 он