Аймгийн Алдарт уяач Ш.Лхагвасүрэн: 14 настайгаасаа л мал дээр гарч, нэгдлийн адуу маллаж эхэлсэн

Дундговь аймгийн Өлзийт сумын уугуул, аймгийн Алдарт уяач Шатарын Лхагвасүрэнтэй уулзаж ярилцлаа.
-Хурдан морь  хэзээнээс уяж эхлэв. Өлзийт сумын хаагуур нутаглаж байна?
-Нэгдлийн адуу малладаг байж байгаад цэрэгт явж, халагдаж ирээд 1982 онд хурдан морь уяж эхэлсэн. Манайх Буянт бригадын хойгуур Цолмонгийн хэц, Солгой төгрөг гээд ус,  ургамал тэгширсэн сайхан газар нутагладаг байсан юм. Би 14 настайгаасаа мал дээр гарч 20 хүрээгүй байхдаа  нэгдлийн олон адуу маллах болсон. Адуу гэдэг хийморилог амьтантай нөхөрлөсөн олон жилийн хөдөлмөрөө үнэлүүлж  30 жилийн дараа аймгийн Алдарт уяач цолоо авч байлаа.
-Айраг түрүү бол тоолохын аргагүй их болсон уу?
-Сумын наадмаас айраггүй буцаж байсан нь үгүй. Аймгаас бол айраг түрүү цөөхөн авсан байх. Анх 1990 онд их насны морь аман хүзүүдүүлж байсан. Гэхдээ аймгийн наадмаас олон удаа морь айрагдуулаад буцаж байлаа.
-Хамгийн одтой жилийн наадам гэвэл хэдэн оны наадмыг нэрлэх бол?
-2001 оны сумын наадамд дөрвөн морь хөтөлж ирээд хоёрыг нь түрүүлгэж, нэгийг нь айрагдуулж нөгөөг нь наймд давхиулж байлаа.
-Сүүлийн жилүүдэд аймгийн наадамд хэрхэн наадаж байна?
-Хамгийн сүүлд гэвэл 2010 оны аймгийн наадамд хоёр бага адуу авчирч  түрүү, аман хүзүүнд давхиулсан.
-Аймгаас гарч олон уралдаж байв уу. Хэнээр  уяачийн эрдмийг заалгаж байв?
-Аймгаас хол явж уралдаагүй.  Адуучин хүний гэр бүлд төрж өссөн болохоор багаасаа л адуу малтай ноцолдож эр болсон. Манай хадам аав ч сайн уяач байсан. Олон хүнээс заавар зөвлөгөө авч байсан.

"Тод магнай" сэтгүүл Дундговь аймгийн тусгай дугаар