Аймгийн Алдарт уяач П.Гэрэлболд: Миний морьд тэжээлгүй ч уралдсан болгондоо айрагддаг

Завхан аймгийн Их-Уул сумын уугуул, аймгийн Алдарт уяач П.Гэрэлболдтой хийсэн ярилцлагыг уншигч танаа хүргэж байна.
-Хэзээнээс хурдан хүлгийн уяа эвлүүлэх болсон бэ?
-Манай аав нутаг орондоо хүндлэгдсэн нэртэй сайн уяач байсан. Аавын маань нэрийг гаргасан хязаалангаасаа эхлээд арав гаруй айрагдсан хурдан халтар азарга байлаа. Хэдийгээр удам дамжсан уяач гэлээ би нэлээд хожуу үеэс морь уяж байгаа. Хүүхдүүдийнхээ сургууль соёлд ойртох гээд нэг хэсэг төвд амьдарсан. Тэгж байгаад 2000 онд хөдөө гарч морь уяад Зартын наадамд хээр даагаа аман хүзүүдүүлж байлаа. Харамсалтай нь тэр жил айхтар зуд болж ахиад нэг хэсэг төв бараадахаас аргагүй болсон.
-Тэгээд хэзээнээс тууштай морь уясан юм бэ?
-2008 оноос хойш тасралтгүй морь уяж байна. 2011 онд бор даагаа түрүүлгэж, халтарыг нь дөрөвлүүлсэн. Бас нэг саарал үрээ аман хүзүүдүүлж, халтар азарга тавлуулан нэг наадмаас дөрвөн айраг хүртэж байлаа. 2012 онд халзан морь овооны наадамд айрагдаад сумынхаа баярт аман хүзүүдсэн. Мөн саарал үрээ маань дахиад айрагдсан. 2013 онд болохоор халзан морь Овооны орой, Хужир, Цэцүүх, Зартын овооны тахилгуудад түрүүлж, Хонгорын овоонд айрагдлаа. Саарал үрээ Их овоо болон Цэцүүхийн тахилгад түрүүлсэн.
-Морьдоо тэжээж байгаа юу?
-Би морь тэжээдэггүй ээ. Сураагүй болоод тэр үү. Миний морьд тэжээл өгөөд ч идэхгүй юм. Уг нь тэжээлтэй морь арай илүү тамиртай байх шиг байгаа юм. Гэхдээ ч манай хэд тэжээлтэй мориноос дутахгүй олон уралдчихаад, уралдсан бүхнээсээ айраг хүртээд л байгаа юм даа.
-Морь уяхдаа юун дээр нь илүүтэй анхаарч байна?
-Би морины хоолонд их анхаарал тавьдаг хүн.Миний туршлагаас үзэхэд хөлс зөвтэй болоод хөнгөрсөн морь хоол нь таарвал аятайхан уралдчихаад л байдаг юм.
"Тод магнай" сэтгүүл Завхан аймгийн тусгай дугаар