Баянхонгор аймгийн улсын шилдэг уяач Л.Ганхүлэг: Зээрд азарга маань намайг олонтаа баярлуулсан

Улс, бүсийн уралдаанаас нэг айраг, аймаг сумдын уралдаанаас хоёр түрүү, нэг айраг хүртсэн амжилтаар 2015 оны "МУ-ын шилдэг уяач"-аар шалгарсан Баянхонгор аймгийн Бөмбөгөр сумын уугуул, аймгийн Алдарт уяач Лувсандашийн Ганхүлэгийн баярын сэтгэгдлийг уншигч танаа хүргэж байна.
-Улсын шилдэг уяачаар шалгарсанд баяр хүргэе.
-Баярлалаа.
-2015 онд одтой сайхан нааджээ дээ. Амжилтаасаа хуваалцаач?
-Миний бие 2012 оноос хойш  хурдан морь уяж, сойж байгаа. Тэр цагаас хойш Засгийн газрын тогтоолт бүсийн уралдаанаас нэг айраг, орон нутгийн чанартай буюу аймаг, аймгийн статустай бүсийн уралдаанаас 15,16 айраг, түрүү хүртээд байна. Улиран одогч 2015 оны хувьд аймаг, сумдын уралдаанаас хоёр түрүү, нэг айраг хүртсэн. Зээрд азарга маань намайг олон удаа баярлуулсаан.
-Азарганыхаа удам угшлыг танилцуулаач?
-Сүхбаатар аймгийн Асгат сумын харьяат Норов гэдэг найзаасаа хязааланд нь аваад түүнээс хойш уяж байна. Зээрд үрээ маань надад ирсэн цагаасаа хойш аймгийн чанартай уралдаанаас 10 айраг, түрүү, улсын чанартай наадмаас нэг айраг аваад байгаа.
-Засгийн газрын тогтоолт бүсийн наадам гэдэг нь...?
-2014 онд Баянхонгор аймагт болсон Ламын Гэгээн Лувсанданзанжанцаны мэлмий гийсний 375 жилийн ой, говийн бүсийн уралдаанд айргийн гуравт хурдалсан. Өнөө жилийн хувьд Өвөрхангай аймгийн хаврын бүсийн уралдаанд түрүүлж, Баянхонгор аймгийн хаврын бүсийн “Номгон хайрханы хурд” уралдаанд аман хүзүүдэж, аймгийн төвийн бүсийн уралдааны түрүүлсэн.
-Удам дамжсан уяачдын нэг гэж сонссон. Дээдчүүлийнхээ талаар танилцуулаач?
-Тиймээ, миний аав Лувсандаш аймгийн Алдарт уяач цолтой. Ааваасаа дээд үеийн сайн мэдэхгүй байнаа. Нуугаад яахав.
-Залуу уяачийн хийморь өөдөө байж, амжилт арвин наадах болтугай.
-Баярлалаа, ерөөл  бат оршиг.
Б.Эрдэнэсүрэн