Уяач Ч.Батжаргал: Говийн хүлгийн чансаа сайжирсан гэдгийг баталсан наадам боллоо

"Говьшанх-5" наадамд Монхор халтар үрээгээ айргийн дөрвөөр хурдлуулсан Өмнөговь аймгийн Цогтцэций сумын уугуул, уяач Ч.Батжаргалын баярын сэтгэгдлийг нь хуваалцлаа.
-Говийн бүсийн уралдаанд хязаалан үрээгээ айрагдууллаа. Баяр хүргэе?
-Баярлалаа. Уул ус, лус савдаг, ард олон баяссан сайхан наадам боллоо. Ганцхан хязаалантай Говьшанхыг зорьж ирээд айргийн дөрвөөр давхиуллаа. Миний Монхор халтар чинь битүү адуу байгаа юм. Хадгалж байгаад нутгийнхаа наадамд уралдуулсан нь оножээ. Хараад байхад энэ жилийн наадамд манай нутгийнхан  их сайхан наадлаа. Говийн хүлгийн чансаа сайжирсан гэдгийг баталсан наадам болж байна даа.
-Монхор халтар хаанахын адуу вэ?
-Тод манлай уяач Тангаагийн унаган адуу. Эцэг нь Сүхбаатарын Халзан сумын Муна гэж уяачийн их хурдан азарга байсан гэсэн. Тангаа эзэнтэй нь ярилцаад өөрийн гүүндээ тавьж хоёр жил төл авсан  юм байна лээ. Ингээд хоёр төл авсны нэг нь охин байж, нэг нь надад ирсэн учиртай.
-Та дааганд нь авсан байх нь ээ?
-Тиймээ. Гэхдээ уяа сойлгыг нь Тод манлай тааруулдаг юм.
-Хэдий үеэс морь мал сонирхож эхлэв?
-Гурван жил гаруй болж байна. Миний аав Чойжил гэж Цогтцэций сумын уугуул хүн байлаа. Авга эмээгийн маань талд морь мал уяж явсан улс бий. Нөгөө талаасаа найз маань хурд хуваалцаж надад хэдэн сайхан адуу бэлэглэсэн юм. Түүнээс хойш уяач болохоор шийдээд суралцаж явна. Одоо аймгийн МСУХ-ны дэд тэргүүн Амарсанаа, Хүрмэн сумын уяачдын холбооны тэргүүн Насандэлгэр бид гурав нэг гал болж явдаг юм.
-Анх ямар адуугаар уяа  эхлүүлж байв? Анхны айраг түрүүгээ хэзээ авч байсан бэ?
-Анх надад Цэцэг-Өлзий гэж найз маань Асгат саарлын удамтай үрээ бэлэглэж байсан юм. Тэгээд дагуулаад хэдэн гүү авсан нь миний анхны адууны наймаа гэж болно. Харин ноднин Баян-Овоо сумын наадамд Амарсанаагийнхаа бэлэглэсэн шарга зүсмийн даагыг айрагдуулсан нь миний анхны амжилт юм.
-Ярилцсанд баярлалаа. Хурдан тууртын босоо цагаан хийморьт өнө мөнх ивээгдэж, айраг, түрүү олныг авч яваарай.
"Говьшанхын хурд" сэтгүүл №01