Д.Батмөнх: Давхардсан тоогоор 220 гаруй уралдаанч хүүхэд оролцсон

Монгол наадам, морин уралдааны амин сүнс нь “морь, хүүхэд мэнд зам цагаан наадах” юм. Сүүлийн жилүүдэд уралдаанч хүүхдийн амь нас, аюулгүй байдлыг хангах асуудлаар нэлээдгүй ажлууд өрнөж буй. “Булганхангайн хурд-2015” хангайн бүсийн уралдааныг зохион байгуулагчид уралдаанч хүүхдийнхээ амь нас, аюулгүй байдлыг хангах тал дээр ихээхэн анхаарч, холбогдох мэргэжлийн байгууллагуудтай хамтарч ажилласан байна. Бид аймгийн хүүхэд, гэр бүл хөгжлийн хэлтсийн мэргэжилтэн Дагвадоржийн Батмөнхөөс тодруулга авсан юм.
-Уралдаанч хүүхдийн амь нас, аюулгүй байдлыг хангах тал дээр хэрхэн ажилласан бэ?
-Хангайн бүсийн уралдааны үеэр манай байгууллага бүрэн бүрэлдэхүүнээрээ ажиллаж, уралдаанч хүүхдийн амь, нас аюулгүй байдлыг хангах тухайд хэд хэдэн шаардлага хүргүүлж, түүнийхээ хэрэгжилтэнд хяналт тавьж ажиллалаа. Жишээлбэл баяр наадмын тухай хуульд заасанчлан долоогоос дээш насны хүүхдээр морь унуулах. Уралдаанч хүүхэд стандартын шаардлага хангасан малгай, өвдгөвч, тохойвч, цээживч зэрэг хамгаалалтын хувцас хэрэгсэл өмссөн байх. Гэнэтийн ослын даатгалд хамрагдсан байх. Эцэг, эх болон уяачдаас зөвшөөрөл авсан байх гэсэн хэд хэдэн шаардлагын хүрээнд хяналт тавьж ажилласан.
-Хоёр өдөрт есөн насны морь уралдсан. Үүнийгээ дагаад уралдаанч хүүхдүүд нэг өдөр олон насны морь унах магадлалтай байсан. Энэ асуудалд анхаарлаа хандуулж байв уу?
-Аймгийн Засаг даргын захирамжаар уралдааныг хоёр өдөрт багтаахаар болсон юм билээ. Төсөв мөнгөтэй холбоотойгоор гаргасан шийдвэр байх л даа. Хангайн бүсийн уралдаанд 12 аймгийн 700 шахам хурдан морь, давхардсан тоогоор 220 гаруй уралдаанч хүүхэд оролцсон. Уралдааны үеэр хүүхэд хамгааллын гишүүд гараанаас эхлээд уралдаан дуусах хүртэл буюу барианд ортол хяналтаа тавьж, холбогдох заавар зөвлөгөөг өгч байсан. Манай аймаг уралдаандаанч.ком гэсэн онлайн бүртгэл хөтөлдөг. Үүн дээрээ тулгуурлаад нарийвчилсан бүртгэл судалгаа хийсэн юм. Хангайн бүсийн уралдааны үеэр хоёр хүүхэд есөн насны морь унасан бол нийт уралдаанчдын 70 шахам хувь нь  3-4 насны морь унасан байна лээ. Харин үлдсэн 28 хувь нь 1-2 насны морь унасан болохыг судалгаагаар тогтоосон. Уралдааны явцад зургаан хүүхэд мориноосоо унаж, анхан шатны тусламж үйлчилгээг аймгийн нэгдсэн эмнэлэгийн эмч, мэргэжилтнүүд үзүүлсэн. Уралдааны үеэр ажилласан  эрүүл мэндийн төвийн тусгай гэр майханд 51 хүүхэд ирж үйлчлүүлсэн байна лээ.
-Зөвхөн ЗГ-ын тогтоолт бүсийн гэлтгүй аймаг, суманд болж байгаа уралдаануудад та бүхэн хяналт тавьдаг байх. Уралдаанч  хүүхдүүд хамгаалалтын хувцас хэрэгслээр бүрэн хангагдаж чадаж байна уу?
-Манай аймагт болж байгаа уралдаануудын үед морь унаач хүүхдүүд 100 хувь хамгаалах хэрэгсэлтэй морддог. Хувцас хэрэгслийн бүрэн бүтэн байдалд манай байгууллага байнга хяналт тавьж байдаг юм.
-Уралдаанч хүүхдээ даатгуулах ёстой гэдгийг уяач бүхэн ухамсарладаг болсон. Харин ямар нэгэн асуудал гарлаа гэхэд даатгалын нөхөн олговор олгох асуудал хэрэгжихгүй байх шиг ажиглагддаг. Энэ тал дээр та бүхэн хяналт тавьдаг уу?
-Даатгалын байгууллага нь ч тэр, эцэг эх, уяачид ч тэр энэ талын ойлголт хандлага тааруу байх шиг санагддаг шүү. Тиймээс манай байгууллага үүнтэй холбоотой зөвлөмж сургалт сурталчилгааг тогтмол хийдэг юм. Мэдээлэл сонссон хүмүүс “Өө тийм байдаг юмуу” гээд гайхаж байх жишээтэй. Өөрөөр хэлбэл нэг жилийн хугацаанд зөвхөн мориноос унах биш, бусад тохиолдлоор бэртэж, гэмтсэн бол  нөхөн төлбөр авах эрхтэй байдаг. Үүнийг уяачид маань тэр бүр мэддэггүй юм шиг байна лээ. Бид хангайн бүсийн уралдааны өмнө даатгалын компанийн төлөөлөгч, захирлуудтай уулзан энэ талаар мэдээлэл өгч хамтарч ажиллах санамж бичигт гарын үсэг зурцгаасан.
-Баяр наадмын тухай хуулиар бай шагналын 20 хувийг уралдаанч хүүхдэд олгох ёстой байдаг. Энэ заалт хэрэгжиж байна уу?
-Хангайн бүсийн уралдааны үеэр бид уралдаанч хүүхдэд олгох ёстой бай шагналыг тусад нь дугтуйнд хийж өгсөн. Ер нь манай аймагт энэ жишиг тогтоод удаж байна.
-Бидний урилгыг хүлээн авч ярилцсанд баярлалаа. Та бүхний ажилд амжилт хүсье.
"Булганхангайн хурд" сэтгүүл №01