Уралдаанч Ө.Шинэбаяр: Анх өвөөгийнхөө хээрийг унаж сумандаа айрагдуулж байсан

АХ-ын 94 жилийн ойн баяр наадмаас...
-Алаг үрээгээ айргийн тавд хурдлууллаа, баяр хүргэе?
-Баярлалаа. Уг нь өнгөнд гарсан юм. Тэгээд замын дунд ороход арван хэд рүү орсон. Хэсэг амарч байгаад ахиад урагшилж, тэгээд л айрагдсандаа. Цагаан өсгийтэй хүрэн үрээ, бас нэг хүрэн үрээ, хээр үрээтэй урд хойноо ороод хэсэг явсан. Хоёр хүрэн нь Төв аймгийн Баянцогт сумын ойгоор айрагдсан гэнэ лээ.
-Уралдааны замд гарахад уяач нь юу гэж захисан бэ?
-“Айрагдахыг л бодоорой” гэсэн. Тэгээд л гараагаа алдахгүй шүү гэж бодоод урдуур орж зогссон.
-Улсын наадмын морь хэдэн жил унаж байгаа вэ?
-Энэ жил л анх удаа унаж байна. Түүнээс өмнө сумынхаа баяр наадамд л морь унаж байсан.
-Аль сумынх билээ?
-Говь-Алтай аймгийн  Хөхморьт сум.
-Алаг үрээ ноднин Ховдод болсон баруун бүсийн уралдаанд  түрүүлсэн. Тэгэхэд чи унаж байсан уу?
-Үгүй ээ. Би энэ жилээс л унаж байгаа. Улсын баярын урд үсэргээнд унаж байгаад баяраар унаж айрагдуулсан. Дараа нь Булганд болсон бүсийн наадамд бас унаж гурваар давхиулсан.
-Танай ангид хурдан морь унадаг хүүхэд олон уу? Улсын наадамд морь айрагдуулсаныг чинь мэдээд баяр хүргэсэн үү?
-Хүүхдүүд мэдэж байна лээ. Манай ангид хурдан морь унадаг хүүхэд хэд хэд бий. Гэхдээ одоогоор улсын наадамд айрагдуулсан хүүхэд надаас өөр байхгүй ээ.
- 11 настай юм байна. Хэдэн настайдаа морь унаж сурсан бэ?
-Дөрвөн настай байхад аав маань зааж өгсөн. Манай аав бас морь уядаг.
-Тэгвэл анх аавынхаа уясан морийг унадаг байжээ дээ?
-Тиймээ. 2010 онд сумынхаа наадамд Баасандорж өвөөгийнхөө хээрийг унаж айрагдуулсан. Тэгээд Говь-Алтай аймгийн Чамдмань сумын наадамд Төмөрхуяг ахын азаргыг унаж хоёр удаа түрүүлгэсэн. Бас Ховд аймгийн Зэрэг сумын 90 жилийн ойд хар азаргыг нь унаж түрүүлгэсэн. Төмөрхуяг ах Баасанжав эмчийн морьдыг уядаг юм.
-Начингийн Баасанжав уу?
-Тийм. Мөн Тэрбиш ахын хээр морийг унаж Чандмань сумын наадамд дөрвөөр давхиулж байсан. Хаврын уралдаанд нэг буурал үрээг нь  унаж айрагдуулсан. Заримыг нь  мартчихаж. Уг нь зөндөө л морь айрагдуулсан.
-Том болоод ямар мэргэжилтэй болох вэ?
-Уяач болохыг хүсдэг.
-Өөрийн нэртэй адуутай юу?
-Бий бий. Намайг даахиа үргээлгэхэд өвөө, Мөнхөө ах хоёр охин даага бэлэглэсэн. Тэр гүүнүүдээс охин голдуу унага гардаг. Тэгж байгаад эр унага гарахаар нь уяна гэж бодож байгаа.
-Амжилт хүсье. Ярилцсанд баярлалаа.
-За баярлалаа.
"Тод магнай" сэтгүүл №70