Сэтгүүлийн шинэ дугаар худалдаанд гарлаа

Бүтэн жил хүлээсэн зун цаг. Өдөр ирэх тусам өнгө засч буй байгаль дэлхий.
Шинэ ногоонд гэдэс цадах таван хошуу мал. Монгол хүмүүний сэтгэл уужирч, магнай тэнийх амгалан цаг. Нар наашилж, наадам ойртож буй энэ л цаг үед сэтгүүлийнхээ шинэхэн дугаарыг уншигч танаа өргөн барьж байна. 
Зочин хойморт саатсан хийморилог эрхэм бол Төв аймгийн Лүн сумын уугуул, Тод манлай уяач Банзрагчийн Билэгдэмбэрэл юм. Хонин жилийн босгон дээр Тод манлай уяач хэмээх эрхэм цолны эзэн болсон түүнтэй  өргөн сэдвээр хөөрөлдлөө.Адууныхаа хурдлах чадварыг сайжруулахаар хичээж буй уяачдыг Тод манлайн ярилцлагыг уншихыг санал болгож байна.Сүүлийн арваад жил энэ чиглэлээр дагнан, бүр эрдмийн зэрэг горилохоор зэхэж буй тэрээр хэд хэдэн үнэтэй санаа хэлсэн шүү.
“Уралдаан” буланд “Хутагтын хурд-2015” хаврын бүсийн уралдаанд түрүүлж, айрагдсан хурдан хүлгүүдийн фото зураг, товч танилцуулга багтсан байгаа. Хаврын бүсийн уралдааныг тухайн жилийн өнгийг шинжих боломжийг олгодог хэмээн уяачид ярьдаг. Тэгвэл хэний уясан , ямар морьд хурдан байхыг  эндээс тандаж болох нь.
Уяаны эрдэмд суралцаж буй залуус, морь сонирхогчдодоо зориулан хүргэдэг “Эмч зөвлөж байна”, “Уяач зөвлөж байна”, “Мэдэхэд илүүдэхгүй” булан бүхэлдээ дэлгэр Монголын их цэнгэл баяр наадамд зориулагдсан гэдгийг тэмдэглэх нь зүйтэй байх.
“Жонон” мал эмнэлгийн их эмч М.Мөнхбаатарын хөтлөн явуулдаг “Эмч зөвлөж байна” буланд энэ удаа хурдан моринд хамгийн элбэг тохиолддог эмгэгүүдийн нэг шингэн алдалт, шингэний дутагдлын талаарх зөвлөгөө багтжээ. Хурдан хүлгийнхээ эрүүл мэндэд анхаарал хандуулдаг эрхэм уяачид та бүхэн тогтож уншаарай.
Залуу уяачдын хүсэн хүлээдэг “Уяач зөвлөж байна” буланд Архангай аймгийн Хотонт сумын уугуул, Тод манлай уяач Ц.Дуламсүрэн саатаж, “Зуны уяа сойлгын онцлог, дээд гурван насны морьдын уяа” гэсэн сэдвээр зөвлөгөө өгсөн байгаа. Монгол наадам ухаарлын наадгай хэмээн үздэг Тод манлайн зөвлөгөөг заавал уншаарай хэмээн зөвлөх байна.
Орон нутгийн уяачдаа алдаршуулах зорилготой “Холбоод” буланд 2014 оны улсын шилдэг салбар Дундговь аймгийн Цагаандэлгэр сумын “Мөнхийн хүлэгтэн” МСУХ-ны төлөөлөгчид уригдаж, шилдгээр шалгарсан арга туршлагаасаа хуваалцсан. Холбооны санхүүжилтийг хэрхэн шийдэхээ мэдэхгүй байгаа бол уншаад үзээрэй. Магадгүй танд шинэ санаа төрүүлж болох юм.

Редакцийн зүгээс онцгойлон санал болгосон эдгээр  булангуудаас гадна уламжлалт булангууд баяжмал мэдээллээр дүүрэн байгаа. Та бүхэн тухлан сууж, таалан уншаарай.

Сэтгүүлийн шинэ дугаарыг хэвлэлийн бирж, "Интерном" дэлгүүр болон  редакцийн 94082992, 95092992, 94012992 дугаарын утсанд холбогдож авна уу.