Францын селль үүлдэр

Францын селль буюу франц унааны адуу өмнө нь англи-нормандын үүлдэр гэж алдаршиж байжээ. Холимог цусны энэ үүлдэр албан ёсоор 1965 онд хүлээн зөвшөөрөгдсөн байна. Нормандын хүнд хөллөгөөний угсаанаас гаралтай энэ адууг хойд африк, өмнөд европын араб, бербер үүлдэрийн адуутай нийлүүлснээр одоогийн хүч тамир сайтай адуу болгон хөгжүүлжээ. XIX зуунд норманд адууг цэвэр цусны азарга болон норфолкын хагас цусны адуугаар сайжруулж англи номандын үүлдэрийг гарган авч байжээ. Цаашдаа цэвэр цусны адууны цусаар сэлбэснээр одоогийн франц уналгын адууны үүлдэр бий болсон юм. Цаг хугацаа өнгөрөх тусам адууны чанар улам сайжирч өндөр үнэлэгдэх болсоор байна. Энэ үүлдэрийн морьд улам хурдан тэсвэртэй болсноор цэвэр цусны морьдын зэрэгцээ дангаар селль морьдын уралдаан зохион байгуулагдах болжээ. Удмын бичигт энэ үүлдэрийг ямар үүлдэртэй нийлүүлснийг тодорхой тэмдэглэсэн байна.
Зориулалт: Францын селль үүлдэрийн морьд одоо бүх төрлийн спортын тэмцээнд оролцож байгаа бөгөөд ялангуяа конкур ба саадтай уралдаан түлхүү оролцдог ажээ. Энэ үүлдэрийн төлөөлөгчийг үржүүлгийн зориулалтаар ашиглаж байна. Үүнээс гадна уралдааны болон сургалтын зорилгод ашиглаж байгаа ба тойрог замд, бас цэргийн албанд ашиглаж байна. Конкур тэмцээнд амжилт гаргасан олон алдартай хүлгүүд францын селль үүлдэрийнх юм.
Гадаад төрх: Франц селль үүлдэрийн адууны толгой жинхэнэ цэвэр цусны адууных шиг эсвэл цэвэр араб цусны адууных шиг байдаг. Цээж хүчирхэг заримдаа босоо өндөр байдаг. Их биеийн суурь сайтай, хүчтэй нуруу, өргөн ташаатай. Ташаа нь харайлтад зориулагдсан мэт боловч хойд хөл нь шулуун байх нь олон. Цэвэр цусны адууны хольцоос хамааран франц селль адуу хүндэвтэр эсвэл хүнд байна. Үс нарийн,бүгдээр зээрд зүсмийнх байдаг.
Сэрвээний өндөр: 1,55-1,68 м
             Энэ морийг үзвэл францын селль үүлдэрийн явдал болон хөдөлгөөний хүчийг мэдрэх болно. Хөнгөн хөдөлгөөн, бөх бат араг яс нь түүнийг эрэлт хэрэгцээтэй спортын морь болохыг баталдаг. Үүний үндэс суурь нь цэвэр цусны адуу, араб, норманд үүлдэр болон хатираа үүлдэрийн адууг нийлүүлсэнд байдаг гэж үздэг. Иймээс гадаад төрх, хэмжээ, жин нь янз бүр байдаг боловч селль морьд морин спортын аль ч төрөлд гялалзсан амжилт үзүүлж чаддаг аж.

"Дэлхийн адуу" нэвтэрхий толиос