Аймгийн Алдарт уяач Ш.Даваагэрэл: Аавын маань унаган халиун морь тойргийнхоо сумдад босоо байсан хүлэг

Завхан аймгийн Завханмандал сумын уугуул, аймгийн Алдарт уяач Ш.Даваагэрэлтэй хийсэн ярилцлагыг хүргэж байна.

-Удам дамжсан уяачдын нэг гэсэн байхаа?
-Тиймээ, миний аав Шагдарсүрэн уяач хүн. Морь уяад гаргасан амжилтаараа аймгийн Алдарт уяач цолны болзол биелүүлсэн ч харамсалтай нь түүнийгээ авч- чадалгүй бурхан болсон. Тэгээд аймгийн МСУХ-ноос аавын маань амжилтыг над дээр тооцон надад аймгийн Алдарт уяач цолыг олгосон. Түүнээс би чинь аймгийн наадмын нэг айрагтай, сумын наадмын хэд хэдэн түрүүтэй л хүн. Хэдийгээр аав минь цолоо авч амжаагүй ч надад түүнийг нь нөхөн олгож байгаад би хувьдаа баяртай байгаа. Аавын маань унаган халиун морь тойргийнхоо сумдад босоо байсан хүлэг.
-Та аавынхаа үлдээсэн унаган адуугаар нааддаг юмаа даа?
-Мэдээж тэгэлгүй яахав. Аавынхаа үлдээсэн хурдан буянг өөрийнхөө хэр хэмжээнд сэлбэж сайжруулан уяж байна. Сантмаргац сумын харьяат Даваахүүгийн Доржоо болон Жигжидсүрэн гэдгийн адуунаас үрээ мал авсан. Түүгээрээ адууныхаа цусыг сэлбэж байна. Мөн би зөвхөн өөрийнхөө гэлтгүй Энхбат, Мөнхзориг гээд дүү нарынхаа морьдыг уядаг. Тэд маань өөр ажил төрөлтэй учраас тэр болгон уяанд оролцож чадахгүй, би л түлхүү оролддог юм. Зоригоо дүүгийн маань нэртэй сартай хээр морь, хүрэн үрээ гээд хурдан хүлгүүд бий.
-Аавыгаа залгамжлаад л уяж байгаа юмаа даа?
-Оюутан болохоосоо өмнө адуугаа маллаж л байсан. 1996 онд “Шонхор” бөхийн дээд сургуульд элсээд 2000 онд төгссөн юм. Тэгээд 2002 оноос хойш хурдан морь уяж байна даа. Энэ дашрамд Идэр сумын харьяат Сүхбаатар ахдаа баярлалаа гэдгээ дуулгамаар байна.
-Сүхбаатар ахдаа юунд талархаж байгаа билээ?
-Тэр хүнээс хүрэн даага авч азарга тавьсан юм. Хүрэн азарга өөрөө хурдлахын сацуу үр төл нь ч гэсэн хурдалж байна. Би хүрэн азаргандаа ааваасаа үлдсэн гүүнүүдээ хураалгасан. Үр төл нь гайгүй дориун адуунууд төрж байна.
-Хүрэн азарга өөрөө яаж давхисан юм бэ?
-Завхан аймгийн 90 жилийн ойд нутгийн нэр тахалж айрагдсан Нарангэрэлийн халтар азаргатай чацуу юм байгаа юм миний хүрэн азарга. Энэ хоёр шүдлэндээ аймгийн наадамд уралдаад, халтар нь гурвалж, хүрэн нь дөрвөлж байсан юм.
-Аймгийн баяр наадмаас нэг айрагтай гэсэн нь энэ байх нь дээ?
-Тиймээ. Миний хүрэн азарга даагандаа л ганц удаа түрүүлж байсан адуу. Түүнээс хойш дан айрагдсан. Одоо ганц алтнаас бусад 23 медаль өлгөөстэй бий.
-Одоо хэдтэй азарга юм бэ?
-Энэ жил нийлж байгаа.
-Ийм залуугаар нь зодог тайлчихаж байгаа хэрэг үү. Эсвэл уралдахгүй байх эрүүл мэндийн шалтгаан байгаа юм уу?
-Азарганыхаа ашгийг бодъё. Үр төлийг нь авъя гэж бодож байгаа юм.Энэ дашрамд танай сэтгүүлээр дамжуулаад хүрэн азарганы эзэн Сүхбаатар ахдаа “Хурдан буянгаа харамгүй хайрласанд баярлалаа. Хүрэн үрээгээр чинь азарга тавьчихсан. Олон жил баярлууллаа. Энэ ачийг тань хариулж нэг даага бэлэглэе” хэмээн дамжуулмаар байна.
-Таны талархлын үгс хаягласан эздэдээ хүрнэ гэдэгт итгэлтэй байна.
-Аяганы хариу өдөртөө, агтны хариу жилдээ гэж сайхан буянаа харамгүй хайрласан ахдаа талархах ёстой гэж бодож байна. Энэ хүртэл зорин ирсэн та бүхэнд ч гэсэн баярлалаа. Ажилд тань амжилт хүсье.
-Баярлалаа. Танд гэсэн амжилт хүсье.

"Тод магнай" сэтгүүл №54