“LUX” аян замын дэрийг зохион бүтээгч Д.Батсайхан:Их аварга Дагвадорж анхны худалдан авагч нь болсон

Монгол хүн шинийг бүтээж.Олон цагаар аян замд, авто машинд явдаг хүмүүст зориулан доргилтоос  хамгаалсан дэрийг зохион бүтээсэн энэ эрхмийг Д.Батсайхан гэдэг. Тэрээр эрх зүйч мэргэжилтэй. Төрсөн ах нь гэр хорооллын модон жорлонд бэхлэгддэг хуванцар суултуурыг зохион бүтээж, амжилтанд хүрсэн нь түүнд шинийг санаачлах урам зориг бэлэглэсэн гэнэ. Ингээд түүнтэй цөөн хором ярилцаж, бүтээлийнх нь талаар лавласнаа уншигч танаа хүргэе.
-Монгол хүн шинийг бүтээсэн тухай сонсох таатай байна. Бүтээлийн эзэнд юун түрүүнд баяр хүргэе.
-Баярлалаа.
-Шинэ бүтээлийнхээ талаар манай уншигчдад танилцуулаач?
-Хөдөө явж байгаад машинд унтаж, хүзүүгээ эвгүй болгочихсон юм. Гэртээ ирээд замд олон цагаар явахад таатай байхуйц аян замын дэр зохион бүтээвэл яадаг бол гэсэн гэсэн санаа анх төрсөн. Түүн дээр Оросын ОРТ сувгаар гарсан нэг нэвтрүүлэг ихэд нөлөөлсөн.  
-Тэр нь юуны нэвтрүүлэг байсан юм бэ?
-Хүмүүс аян замд явахдаа унтаж толгой, хүзүүгээ  их савчдагаас болж  зөөлөн эдийн хөнгөн бэртэл авах, аян замд алжааж ядрахын гол эх үүсвэр болдог  тухай ярьж байсан. Тэгээд л 10 кг баримлын шавар аваад бүтэн хоёр сарын турш маш олон янзаар туршсан. Сүүлдээ гэрийнхэн маань гайхаад “бие чинь зүгээр үү” гэж хүртэл  асуусан шүү. Тийнхүү уйгагүй оролдсоны эцэст энэхүү загвараа гаргаж, Монголдоо үйлдвэрлэчих санаатай нэлээд судалсан. Гэвч пластик үйлдвэр байхгүй болохоор Хятадад захиалж хийлгэхээс өөр аргагүй болсон.
-Оюуны өмчийн  газраар баталгаажуулчихсан юм байна.Таны энэхүү бүтээл ямар давуу талуудтай вэ?
-Дэрний дотор тал нь налуу учраас  тухтай. Өөрөөр хэлбэл шанаа, хүзүүний хонхорхой  зэрэгт ямар нэг байдлаар тулахгүй. Гол материал нь Солонгосын унтлагын зориулалттай  чийглэг, сэрүүн чанарын порлон. Энэхүү материал нь хүзүүг  халж  хөөргөхгүй давуу талтай. Гурав дахь давуу тал нь машины суудлын дэрэнд бэхлэгдэх учраас донсолгоонд хөдөлж, доргихгүй. Дөрөв дэх давуу тал нь тухайн хүний биеийн овор хэмжээнд тохирон ихэсгэж, багасгах боломжтой. Тав дахь давуу тал нь хэрэглэхгүй үедээ буцааж дэлгээд хайрцаганд хийчихнэ. Машиндаа хадгалахад овор хэмжээ багатай. Гадна материалын тухайд үслэг зөөлөн, хар саарал, шаргал хоёр өнгөний сонголттой. Бид оюуны өмчийн газраар баталгаажуулах гээд очиход маш их сайшааж, “зөвхөн дотоододоо бус олон улсын зах зээлд гаргаж арилжих хэрэгтэй” талаар зөвлөсөн.Магадгүй цаашдаа улам боловсронгуй болгоод олон улсын зах зээлд нэвтрүүлэхийг үгүйсгэхгүй. Оросуудад үзүүлсэн  тун таатай хүлээж авна лээ.
-Авто машинаар голдуу аялдаг бидэн шиг хүнд гарцаагүй хэрэгтэй зүйл байна. Худалдаанд гарсан уу?
-Гарсаан. Бүтээгдэхүүнээ дөнгөж авчраад “Sky” их дэлгүүрт орж танилцуулга хийчихээд гарч явахдаа Их аварга Дагвадоржтой тааралдсан юм. Тэгээд ихэд олзуурхаж бүтээгдэхүүнээ танилцуултал “Монгол хүний бүтээлийг дэмжилгүй яахав” гээд газар дээр нь нэгийг худалдаж авсан.
-Анхны худалдан авагч нь болжээ дээ?
-Тиймээ.Дараа нь дахин залгаад ээж, аавдаа авмаар байна гээд дөрвөн ширхгийг нэмж авсан. Дэлхийн олон нэртэй брэндийг хэрэглэдэг Их аварга маань ийн таалсанд бид ч бас их баяртай байгаа. Мөн уралдаан тэмцээн гээд олон цагаар машинд явдаг уяачдад таниулах үүднээс Онон Тод манлайд нэгийг бэлэглэсэн. Тэгсэн тун ам сайтай байна лээ. 
-Их аварга, Тод манлайтай санал нэг байна. Бүтээгдэхүүнийг хаанаас худалдан авч болох вэ?
-“Номин” их дэлгүүрийн 22-ын товчоо болон Чулуун-Овоон дахь салбараар худалдаалж байгаа. 22-ын товчооны салбарт өгсөн дэрнүүд маань удалгүй дуусчихаад байгаа.Нийслэлийн хэрэглэгчид “Номин” их дэлгүүр, “Зиг Заг” компанийн салбаруудаас худалдан авах боломжтой. Мөн “Эссо” машины тос тосолгооны төвүүдээс худалдан авч болно.
-Хаягаар хүргэх үйлчилгээ үзүүлэх үү?
-Улаанбаатар хотын хаана ч байсан үнэгүй хүргэж өгнө. Бүр Улиастай, Тахилт руу байсан ч үнэгүй хүргэж өгнө.Сонирхсон хүмүүс 9665-4968 дугаарын утсаар болон b.oyumaa@yahoo.com хаягаар холбогдоорой.
-Ярилцсанд баярлалаа. Амжилт хүсье.
Б.Долзодмаа