Аймгийн Алдарт уяач Ж.Отгонбаатар: Уяачид нэгдмэл санаатай байх нь чухал

Дундговь аймгийн Өлзийт сумын хийморилог уяачдыг төлөөлж буй дараагийн эрхэм бол аймгийн Алдарт уяач Жамсрангийн Отгонбаатар юм. Түүний аав Жамсран гэж их, бага хоёр хурдан хүрэн азаргатай, морь сайхан эдэлдэг хүн байсан бөгөөд Гурвансайхан сумын наадамд унаж очсон морь нь түрүүлээд, уясан адуу нь айрагдаж байсан гэдэг. Ж.Отгонбаатар хүүхэд байхдаа том ах Цэвэлийн уясан хүлгүүдийг унаж, сумынхаа 60 жилийн ойд шүдлэн үрээ хурдлуулж, Гурвансайханд хар даага аман хүзүүдүүлж, их морь айрагдуулж байсан уралдаанчаас уяачийн гараагаа эхэлсэн удамт залуу уяач. Тэрээр морь уях эрдэмд олон жил суралцсан боловч айраг, түрүү хүртэж чадалгүй байсаар өмийг нь цагаан азарга нь нээж өгчээ. Энэ азарга Өндөршилийн Түмэн-Од гэх залуугийн унаган адуу бөгөөд хязаалан үрээ авсан байна. Тэр жилээ Гурвансайхан сумын наадамд бас нэг бор үрээний хамт гурав, дөрвөөр айрагдаж, дараа жил нь соёолон мөн дөрөв, таваар хурдалжээ. Түүнээс хойш “Мандалын хурд” аймгийн хаврын бүсийн уралдаанд нэг айрагдаж, Луусын наадам, Хулд сумын 90 жилд түрүүлж, мөн Өлзийт суманд хоёр түрүүлсэн аж. Ж.Отгонбаатар моринд шимтэж буй залуу уяачийн хувьд хамгийн чухал нь хөдөлмөр, дээрээс нь морио мэдэрч уях хэрэгтэй гэж бодож явдаг бөгөөд адууныхаа чанарыг сайжруулах тал дээр анхаарч эхэлж байгаа гэнэ лээ.

У.Энхмаа