Аймгийн Алдарт уяач Ц.Даваадорж: Морин жил миний хувьд амжилт бүтээл арвинтай сайхан байлаа

Төрөлх сумынхаа түүхт 90 жилийн ойн баяр наадамд амжилттай наадсан аймгийн Алдарт уяач Ц.Даваадоржийн ярилцлагыг хүргэж байна.

-Сумынхаа 90 жилийн ойн баяр наадамд одтой сайхан наадсан танд баяр хүргэе?
-Баярлалаа. Баруунбүрэн сумын маань 90 жилийн ойн баяр наадам өтгөн сайхан болж, зургаан насны морь уяад их насаа түрүүлгэж, соёолонгоо айрагдууллаа. Бусад нь арав гаргаад давсан. Түрүүлдэг хээр морь маань миний өөрийн унаган адуу. Энэ жил арван настай залуухан морь байгаа юм. Үүнээс өмнө сумандаа хоёр түрүүлж, Эрдэнэт, Булганы  наадмуудад айрагдаж байсан адуу. Ер нь уралдсан цагаасаа хойш том, жижиг наадмаас 40 гаруй медаль аваад байгаа.
-Таваар давхисан соёолон үрээ тань хаанахын адуу вэ?
-Сүхбаатар аймгийн Сүхбаатар сумын адуу. Битүү шахуу үрээ л дээ.
-Зөвхөн сумын 90 жилийн ой гэлтгүй морин жилийн уралдаануудад одтой сайхан наадсан гэсэн?
-Тиймээ. Эрдэнэтийн Бүрэнбүсийн овооны наадамд хээр морьтойгоо очиж, дөрвөөр давхиулаад долдугаар сарын 4, 5-нд Сэлэнгэ аймгийн Сант сумын ойд очиж азарганаас бусад таван насны  морьд түрүүлгэж, айрагдуулсан. Манай Бүрэнгийн Бүрэнжаргал гэдэг хүний унаган хүрэн халзан морь маань гурваар, Сүхбаатар гаралтай цоохор соёолон хоёроор, миний өөрийн унаган хул хязаалан гурваар давхисан. Мөн хоёр шүдлэн уралдуулж харыг  нь түрүүлгэн, хулыг нь дөрвөөр давхиулсан. Бас даага аман хүзүүдсэн юм байна.Түүний дараа Эрдэнэтийн наадамд очиж хээр морио дөрөвлүүлээд, хар шүдлэнгээ долоолуулсан. Тэр үрээ манай эндхийн Пүрэвдорж гэж хүний унаган адуу байгаа юм.
-Амжилт арвинтай сайхан нааджээ. Хэзээнээс хурдан хүлгийн уяа тааруулж байгаа вэ?
-Тиймээ, улиран одож байгаа морин жил миний хувьд амжилт бүтээл арвинтай сайхан жил байлаа. Би уяачийн эрдэмд шамдаад хорин жил болж байна. 1994 оноос эхлэн аавынхаа удирдлаган дор морь уяж байгаад сүүлдээ бие даасан. Өнгөрсөн 20 жилийн хугацаанд аймаг, сумын чанартай наадмуудад бишгүй сайхан наадаж, 2014 онд аймгийн Алдарт уяач цолоо авсан. Эрдэнэт, Булганаар голдуу нааддаг.
-Эрдэнэтийнхэн эртнээс адуугаа сайжруулсан.Тэдэнтэй уралдахын тулд жишгийг нь дагах хэрэгтэй болдог байх. Шинэ цагийн адуутай юу?
-Ганц нэг эрлийз гүү бий. Голдуу нутгийн унаган адуугаар нааддаг. Манай Баруунбүрэн сум дээр үеэсээ хурдтай. Намираа хулын угшил их тархсан. Дээр нь манай аав Цэнд-Аюуш уяач хүн. Би багадаа аавынхаа уясан морийг унаж өссөн.
 -Удам дамжсан уяачийн дараа дараагийн уралдаануудад амжилт хүсье. Ярилцсанд баярлалаа.
-Баярлалаа. Та бүхний ажилд амжилт хүсье.

Б.Долзодмаа