2014 оны өндөр чансаатай уяачид

1.Улсын баяр наадмаас найман айраг, бүсийн уралдаанаас хоёр түрүү,  найман айраг хүртэн одтой сайхан наадсан Төв аймгийн Сэргэлэн сумын уугуул,  аймгийн Алдарт уяач Ононгийн Батбилэг 51 оноогоор жагсаалтыг тэргүүлжээ. Удам дамжсан уяачдын уухайд түрлэг нэмж, урамтай сайхан наадсан залуу уяачид уншигчдынхаа өмнөөс баяр хүргэн, амжилт хүсье.
2. Улсын наадмаас хоёр айраг, бүсийн уралдаанаас гурван түрүү, есөн айраг хүртсэн Ховд аймгийн Дарви сумын уугуул, МУ-ын Алдарт уяач Түвдэнгийн Батцоож 37 оноогоор шилдэг уяачдын “аман хүзүүнд хурдалжээ”. Тэрээр мөн л удамт уяачдын нэг юм.
3.Жагсаалтын гуравдугаарт улсын баяр наадмаас нэг түрүү, нэг айраг, бүсийн уралдаанаас хоёр түрүү, зургаан айраг хүртсэн Дорнод аймгийн Цагаан-Овоо сумын уугуул, аймгийн Алдарт уяач Түвдэнжаажидын Батзориг  31 оноогоор бичигдсэн байна. Тэрээр сүүлийн жилүүдэд тогтмол амжилт үзүүлж байгаа энэ цагийн эрдэмт уяачдын нэг билээ.
4. Улсын баяр наадмаас нэг айраг, бүсийн уралдаанаас нэг түрүү, есөн  айраг хүртэн 26 оноо цуглуулсан Төв аймгийн Сэргэлэн сумын уугуул, нийслэлийн Алдарт уяач Түмэндэлгэрийн Ихбаяр дөрөвдүгээрт эрэмбэлэгдсэн байна.
5. Төрийн их баяр наадмаас нэг түрүү, нэг айраг, бүсийн уралдаанаас таван айраг хүртсэн Төв аймгийн Баянцогт сумын харьяат  Тод манлай уяач Д.Мөнхбатын хүү залуу уяач М.Цэрэнжав 22 оноогоор шилдэг уяачдын тавдугаарт бичигджээ.
6. Улсын баяр наадмаас нэг айраг, бүсийн уралдаанаас хоёр түрүү, дөрвөн айраг хүртэн 21 онооны эзэн болсон Төв аймгийн Баянцогт сумын харьяат  Сумьяасүрэнгийн Ганбаатар шилдгүүдийн эгнээнд багтан зургаад бичигджээ. Ийнхүү Сумьяасүрэн агсны хөвгүүд Монголын хурдан морины ертөнцөд авьяас чадвараараа үнэлэгдсээр байна.
7.  Үндэсний их баяр наадмаас хоёр айраг, бүсийн уралдаанаас нэг түрүү, дөрвөн айраг хүртсэн Төв аймгийн Баянцогт сумын харьяат  МУ-ын Манлай уяач Дашцэрэнгийн Одгэрэл 21 оноогоор долдугаарт бичигдсэн байна. Ийнхүү Баянцогтын шилдэг уяачид шил дараалан жагслаа.
8. Шилдэг уяачдын наймдугаар байранд улсын баяр наадмаас нэг айраг, бүсийн уралдаанаас нэг түрүү, гурван айраг хүртсэн Говь-Алтай аймгийн Баян-Уул сумын уугуул, МУ-ын Алдарт уяач Пүрэвдоржийн Алтансүх 17 оноогоор бичигджээ.
9. Жагсаалтын есдүгээрт үндэсний их баяр наадмаас нэг түрүү, бүсийн уралдаанаас гурван түрүү  хүртэн 16 онооны эзэн болсон Говь-Алтай аймгийн Жаргалан сумын уугуул Золзаяагийн Алтан-Эрдэнэ бичигдсэн байна.2014 оны шилдэг уяачдадаа халуун баяр хүргэж, уясан хүлгүүд улам илүү хурдлахын өлзийтэй ерөөлийг өргөн дэвшүүлье.
Б.Долзодмаа