Аймгийн Алдарт уяач А.Пүрэвсүрэн: Гэгээнтнийхээ наадамд их морь айрагдуулсан гэдгээрээ илүүтэй бахархсан

Төрийн зарлигт бүсийн наадамд их насны морь аман хүзүүнд хурдлуулан нутгийн нэрийг өргөсөн А.Пүрэвсүрэн Алдартаас баярын сэтгэгдлийг хуваалцснаа эрхэм уншигч танаа хүргэе. Тэрээр Баян-Овоо сумын бахархалт эрчүүдийн нэг билээ.
-Буурал морь говийн бүсийн уралдаанд аман хүзүүнд хурдаллаа. Баяр хүргэе?
-Баярлалаа. Буурал морь маань Сүхбаатар аймгийн Асгат сумын адуу. Хавар шүдлэн үрээ ирээд Өвөрхангай аймагт болсон бооцоот уралдаанд түрүүлж, анхны айргаа хүртэн амжилтын гараагаа эхэлж байсан. Түүний дараа  Архангай аймгийн Цахир суманд болсон “Буур” хэмээх  Жамъян  аваргын мэндэлсний 110 жилийн ойд аман хүзүүдсэн. Дараа жил нь хязааландаа хэд хэдэн бага наадамд айрагдсан.
-2009 оны хангайн бүсийн наадамд уралдаагүй юм уу?
-Уралдсан.15, 16-аар ирсэн юм. Соёолондоо Баянхонгор аймаг байгуулагдсаны 70 жилийн ойд гурваар давхиад, хавчиг морь өнжиж, энэ жил нийлээд  Заг сумын 90 жилийн ойд аман хүзүүдээд  давхар уяагаар говийн бүсийн уралдаанд мөн хүзүүнд хурдаллаа. Одоогийн байдлаар том, бага наадам нийлсэн арав гаруй медальтай.
-Алдарт говийн бүсийн уралдаанд хэдэн насны морь мордуулсан бэ?
-Азарга, их морь мордуулсан. Азарга нь арваар ирнэ лээ. Мөн Сүхбаатар аймгийн Асгат сумын адуу.
-Зүүн зүгийн адуугаар түлхүү нааддаг юмаа даа. Хэзээнээс хурдан хүлгийн уяа тааруулж байгаа вэ?
-Нэлээд хэдэн жил болж байнаа. Аймаг, аймгийн чанартай наадмаас арав гаруй айраг, түрүү хүртсэн хэмээн 2008 онд аймгийн Алдарт уяач цол авсан. Зүүн зүгийн адуугаар илүүтэй нааддаг ч нутгийн адуу ч мөн бий. Миний морьдын уяа сойлгыг аймгийн Алдарт уяач Бүрэнтөр, Ганзориг нар тааруулдаг. -Төрийн зарлигт  наадамд их насны морь айрагдуулах уяач бүрийн нууцхан хүсэл байдаг байх. Тэрхүү хүслээ гүйцэлдүүлэх мөчид юу бодогддог юм бэ?
-Үнэхээр их догдолдог юм билээ. Магадгүй эр хүний самсаа шархирдаг цөөн мөчийн нэг нь том наадамд морь айрагдах тэр агшин байдаг байх. Ер нь л итгэж өгөхгүй байсан шүү. Бурхан шашны нэрт зүтгэлтэн Ламын гэгээн Лувсанданзанжанцаны мэлмий гийсний 375 жилийн ойг тохиолдуулан хийсэн энэ том наадамд их насны морь айрагдуулсандаа илүүтэй баярласан.
-Өмнө нь Засгийн газрын тогтоолт бүсийн наадамд оролцож байсан уу?
-2007 оны “Хотгойдын хурд” хангайн бүсийн уралдаанд оролцож, хонгор шүдлэнгээ 12-оор давхиулж байлаа. Тэр маань хожим нас нийлээд аймгийнхаа баяр наадамд олон түрүүлж, айрагдсан. Би тэр болгон гарч уралдаад байдаггүй ч хааяа нэг явбал айраг, түрүү алддаггүй юмаа. Хил залгаа оршдог Архангай, Өвөрхангай зэрэг аймагт зохион байгуулагдсан уралдаануудад оролцож, айраг түрүү олныг авсан. Жишээлбэл, Өвөрхангай аймагт болсон Цэрэнтогтох,Сумъяабазар  нарын Аваргуудын мялаалга наадамд соёолон гурваар давхиулж, Архангай аймагт болсон  "Буур" хэмээх Жамъян аваргын 110 жилийн ойн  баяр наадамд их насны морь таваар давхиулж, шүдлэн үрээ аман хүзүүдүүнд хурдлуулсан.
-Цаашдын тань ажил үйлст амжилт хүсье.
"Тод магнай" сэтгүүл №59