Аймгийн Алдарт уяач Д.Нямдорж: Баруун бүсийн гурав дахь наадамдаа айрагдлаа

-Баруун бүсийн наадамд азарга айрагдуулсан танд баяр хүргэе. Баярынхаа сэтгэгдлээс хуваалцаач?
-Баярлалаа. Сэтгэл их өндөр байна. Миний хүрэн азарга Увс аймгийн Баруунтуруун сумын уугуул Бандгаа гэдэг залуугийн унаган адуу. 2006 онд шүдлэндээ Говь-Алтай аймагт болсон баруун бүсийн уралдаанд гурваар давхиж, 2011 онд болсон Ховд аймгийн 80 жилийн ойгоор түрүүлээд, 2012 онд Баян-Өлгий аймагт болсон баруун бүсийн уралдаанд аман хүзүүдсэн. Энэ жил Ховд аймагт болж буй баруун бүсийн уралдаанд гурваар давхилаа.
-Хэдтэй азарга вэ?
-11 настай. Одоогоор баруун бүсийн гурван наадамд айрагдаад байна. Ер нь дааган цагаасаа эхэлж уягдан сум болон бусад наадмаас 20-иод медальтай болоод байгаа.
-Энэ наадамд хэдэн насны морьтой ирэв?
-Азарга, даага, хязаалантай ирсэн. Даага 11-ээр давхилаа. Уг нь монгол даагаа хөтөлж ирсэн ч өндөр гэсэн шалтгаанаар хасагдаад эрлийз бага насанд уралдаад 11-ээр давхилаа.  Цаашдаа ялгалтан дээрээ анхаарахгүй бол томируун болгоныг л хасчих гээд байна шүү дээ.
-Ярилцсанд баярлалаа.
А.Тэлмэн