Аймгийн Алдарт уяач Г.Гонгоржав: Аймгийн 70 жилд манайхны угшилтай гурван адуу түрүүлж айрагдсан

Сүхбаатар аймгийн Дарьганга сумын уугуул, аймгийн Алдарт уяач Г.Гонгоржавын ярилцлагыг хүргэж байна.
-Улсын наадамд аман хүзүүдсэн Нямцэрэнгийн хар шүдлэн танай адууны угшилтай гэсэн. Тэр талаараа дэлгэрүүлж яриач?
-Нямцэрэн манай хүргэн байгаа юм. Би хүргэндээ өөрийн хурдан хүрэн азарганы төлийн төл хүрэн үрээ өгч, түүнээс хар шүдлэн гарсан. Хар үрээ шүдлэндээ Дорноговийн бүсийн уралдаанд тавлаж, өнгөрсөн жил улсын наадамд хүзүүдээд, аймгийнхаа 70 жилийн ойд түрүүлсэн. Хар үрээний эх нь Далиу ногооны цустай хээр гүү байдаг.
-Таны хүрэн азарга хаанахын адуу вэ?
-Сүхбаатар аймгийн Халзан сумын Түмэнжаргал гэдэг найзаасаа хүрэн соёолон үрээ авсан нь миний хүрэн азарга байгаа юм. Сумынхаа наадамд дөрвөн удаа айрагдсан өвгөн хүрэн азарга маань өдгөө 22 настай адуундаа явж байна. Хүрэн азарга өөрөө хурднаас гадна үр төлүүд нь цөм хурдалсан. Нямцэрэнд өгсөн хүрэн азарганаас  2009 оны Дорнодын зүүн бүсэд түрүүлдэг хүрэн хязаалан гарсан. Нямцэрэн гишүүнд өгсөн юм билээ. Өнгөрсөн жил аймгийн 70 жилийн ойд манай угшилтай адуунаас хоёр нь түрүүлж, нэг нь аман хүзүүдсэн.
-Тэр хүлгэдийнхээ талаар дэлгэрүүлээч?
-Түрүүлсэн алаг соёолон манай хүрэн азарганы төлийнх нь төл байгаа юм. Манай нутгийн Чулуунбаатар  хүрэн азарганд маань гүү тавьж, түүнээс нь гарсан  төл нь Бат-Эрдэнэ алаг соёолон.Нямцэрэнгийн харын тухайд дээр ярьчихсан. Мөн аман хүзүүдсэн П.Баянхүүгийн хүрэн халзан  соёолонгийн эцэг тал нь манай адууны угшилтай. Миний хүрэн азарганы төрсөн дүүгийн төлийн төл байгаа юм.
-Хүрэн азарганы төлүүд нээрэн л хурдан юм. Өөрөө гадагшаа гарч давхисан адуу бий юу?
-Сумандаа зарагдсан адуунууд бас давхисаан. Манай ах Шагдарт нэг хүрэн соёолон байсан нь сумынхаа наадамд аман хүзүүдсэн. Мөн сумынхаа наадамд аман хүзүүдсэн Дашзэвэгийн зээрд морь, айрагдсан зээрд азарга манай адууны угшилтай.
-Таны хувьд өөрөө хүрэн азарганы үр төлөөр хэрхэн наадсан бэ?
-Хүрэн морь сумынхаа наадамд дөрвөөр давхиулсан. Бас нэг зээрд азарга сумынхаа наадамд аман хүзүүдүүлж, хонгор морь сумынхаа наадамд айрагдуулан Түвшинширээ сумын 80 жилд таваар оруулсан.
-70 жилийн ойнхоо босгон дээр Алдарт уяач цолоо авсан юм билээ. Хэзээнээс уяа эвлүүлэх болсон юм бэ?
-Тэгсээн 2012 онд аймгийнхаа 70 жилээр холбооны тэргүүн байсан Ч.Гансүхээс Алдарт уяач цолоо гардаж авсан. 2003 оноос эхлэн бие даан морь уяж сумынхаа баяр наадмаас 10 айраг түрүү авсан  байдаг юм.
-Унаган адуугаараа урамтай сайхан наадаарай. Амжилт хүсье.

А.Мөнх /"Тод магнай" сэтгүүл. Дугаар 07/42/. 2013 он/