Аймгийн Алдарт уяач Н.Энхболд: Хүрэн азарга маань Чулуун гуайн Өндөр зээрдийнх нь угсааны адуу

-“Дүнжингаравын хурд-2014” хаврын бүсийн уралдаанд сүргийн манлай азарга түрүүлгэсэн танд баяр хүргэе. Баярынхаа сэтгэгдлээс хуваалцаач?
-Баярлалаа. Маш их баяртай байна.
-Өнөө жилийн наадам говьчуудынх боллоо. Хүрэн азарганы эзэн өмнийн шаргал говийн хүү гэсэн байх аа?
-Тиймээ, би Өмнөговь аймгийн Ханхонгор сумын хүн. Миний хүрэн азарга бол Сүхбаатар аймгийн Мөнххаан сумын уугуул, аймгийн Алдарт уяач “Өндөр” хэмээх Чулууны унаган адуу. Хүрэн азарга маань “Дүнжингаравын хурд” уралдаандаа одтой сайхан түрүүлж, Өмнөговьчууд, тэр дундаа “Ажнай” галынхны маань магнайг тэнийлгэлээ.
-Тухайн жилийн өнгө тольдох энэхүү уралдаанд хэд дэх жилдээ ирж оролцож байна вэ?
-Анх удаа оролцож байна. Анх ирсэн жилээ азаргаа түрүүлгэж, ёстой нөгөө магнай тэнийнэ гэдэг нь болж байна. 
-Хүрэн азарганыхаа амжилтаас дуулгаач. Өмнө нь ямар, ямар наадамд түрүүлж, айрагдаж байсан бэ?
-Нутагтаа болсон бага наадамд аман хүзүүдээд, дараа нь Дундговь аймгийн хаврын бүсийн “Мандалын хурд” уралдаанд түрүүлсэн. Тэгээд өнгөрсөн жил өнжөөд, энэ жил Өмнөговь аймагт болдог бооцоот уралдаанд түрүүлж, дараа нь “Ажнай” галынхаа наадамд аман хүзүүнд хурдлаад “Дүнжингарав“-таа ирсэн дээ.
-Өөрөө хэдтэй адуу авч байсан юм бэ?
-Надад долоон настай азарга ирж байсан. Энэ жил есөн настай. Чулуун гуайн Өндөр зээрд хэмээх хурдан азарганы угсааны адуу гэнэ лээ. Би эхийг нь сайн мэддэггүй юм.
-Энхболд Алдарт хэзээнээс хурдан хүлгийн уяа тааруулах болсон бэ?
-Би найман настайгаасаа эхлээд 16 хүртлээ хурдан морь унасан хүн. Морь унаж байхдаа аймаг, сумын наадмаас айраг, түрүү алддаггүй л байлаа. Харин уяачийнхаа хувьд 2001 оноос хойш нэг хэсэг завсарлаж байгаад 2009 оноос дахин уяж байна. Сүхбаатар аймгийн Мөнххаан, Халзан сумаас адуу авсан.
-Хэдэн онд аймгийн Алдарт уяач цол хүртсэн бэ?
-2013 онд аймгийн Алдарт уяач цолоо авсаан.
-Хүрэн азарганыхаа дараагийн уралдааныг хэрхэн төлөвлөж байгаа вэ?
-Энэ жил манай Өмнөговь аймаг, аймгийнхаа шилмэл хүлгүүдийг тодруулах юм. Түүнд ямартаа ч уралдана. Тэгээд дараа нь улсынхаа баяр наадамд ирж оролцох байх даа.
-Дараа дараагийн уралдаануудад тань амжилт хүсье. Ярилцсанд баярлалаа.
-Та бүхэнд ч гэсэн баярлалаа. Ажлын амжилт хүсье.

У.Энхмаа