Унаач Ж.Бүдбазар: Энэ жил улс, бүсээс хоёр түрүү, хоёр айрагтай наадсан

Баяр наадмын хурдан морины уралдааны эрлийз дээд насанд Төв аймгийн Сэргэлэн сумын аймгийн Алдарт уяач Ч.Ган-Очирын өсгий цагааныг 11 настай Ж.Бүдбазар хүү унаж хурдлуулан түрүү магнай болсон юм. Төв аймгийн Лүн сумын малчин Жигжидийн хүү Бүдбазар хурдан морь унаад зургаан жил болж байгаа бөгөөд зөвхөн энэ жил  гарсаар “Дүнжингаравын хурд 2013” уралдаанд аймгийн Алдарт уяач Ч.Ган-Очирын өсгий цагаан зээрдийг эрлийз дээд насанд тавлуулж, улсын наадамд түрүүлгэжээ. Мөн Завхан аймгийн 90 жил баруун бүсийн даншиг наадамд МУ-ын Алдарт уяач Д.Дагвадоржийн хул азаргыг түрүүлгэчихээд, “Монгол адуу 3000” гиннесийн уралдаанд баруун бүсдээ Д.Дагвадоржийн бор морийг тавлуулан тун ч одтой нааджээ. Ингээд түүнтэй ярилцсанаа хүргэж байна.
-“Тод магнай”-н уншигчдад өөрийгөө танилцуулна уу?
-Намайг Жигжидийн Бүдбазар гэдэг. Би Төв аймгийн Зуунмод сумын дөрөвдүгээр багийн дунд сургуулийн тавдугаар ангид сурдаг. Ээж, аав маань Төв аймгийн Лүн сумын малчин хүмүүс бий. Хонь малладаг юм. Бид эцэг эхээсээ дөрвүүлээ. Манай ах хурдан морь унадаг байгаад хасагдсан. Ах маань их олон айраг түрүүтэй. Харин би хурдан морь унаад зургаан жил болж байна. Анх ааваараа заалгаж хонины морь унаж сурч байлаа.
-Мэдээж анхны уралдаан сэтгэлд их тод үлдсэн байдаг байх даа?
-Би бол сайн санадаггүй юмаа. Ямар ч байсан Лүн суманд айлын шинэ гэрийн найранд аавынхаа найзын морийг унаж уралдаж байлаа. Гэхдээ аль хавьцаа ирснийг мэддэггүй. Хүүхэд байсан болохоор хөөрөөд тэр байх даа. Түүнээс хойш сум аймаг, улс бүсийн олон наадамд оролцлоо. Олон ч айраг түрүү авсан байхаа. Тоолж байгаагүй юм байна. Лүн суманд байхдаа уяач Бат-Эрдэнэ ахынхаа морийг унадаг байлаа. Түүний саарал морийг хоёр гурван ч наадамд түрүүлгэж байсан. Харин сүүлийн жилүүдэд “Ажнай” галынхаа МУ-ын Алдарт уяач Д.Дагвадорж, аймгийн Алдарт уяач Ч.Ган-Очир, аймгийн Алдарт уяач Хэрлэн ах нарынхаа морийг унаж байна. Манай “Ажнай” гал чинь олон унаач хүүхэдтэй.
-“Ажнай” галдаа амьдардаг уу. Гэрээ санаж байна уу?
-Зуунмод суманд ирээд гурав, дөрвөн жил болж байна. Галдаа амьдардаг юм. Харин сурагчдын болон зуны амралтаараа гэртээ харьдаг болохоор санаад сүйд болдоггүй.
-Энэ жил хэдэн насны морь унаж, хурдлуулсан бэ?
-Зургаан насны морь унасан. Эндээс улсын наадмаар Ган-Очир ахынхаа өсгий цагаан зээрдийг түрүүлгэж, Завхан аймгийн 90 жил, баруун бүсийн даншигт наадамд МУ-ын Алдарт уяач Д.Дагвадоржийн хул азаргыг түрүүлгэчихээд “Монгол адуу 3000” уралдааны баруун бүсэд бор морийг  нь тавлуулсан. Бас өвөл “Дүнжингаравын хурд  2013”-аар Ч.Ган-Очирын ахынхаа өсгий цагааныг эрлийз дээд насанд тавлууллаа. Энэ жил сайхан наадсан шүү. 
-Тийм байна. Нууц биш бол цалингаа юунд зарцуулдаг вэ?
-Дансандаа хадгалж байгаа. Том болоод хэрэглэнэ.
-Том болоод ямар мэргэжилтэй болох вэ?
-Уяач болно гэж бодож байгаа.
-Ярилцсанд баярлалаа. Хүсэл мөрөөдлөө биелүүлж, алдар нэрээ дуурсгасан сайн уяач болоорой.

А.Мөнх /Тод магнай сэтгүүл. Дугаар /11/ 46/