Батмөнх начин байгууллагынхаа барилдаанд манлайллаа

“Харганат цамхаг” группээс зохион байгуулж буй сар шинийн барилдаан Хан-Уул дүүргийн спортын ордонд болж у.н А.Батмөнх, а.а Б.Батдорж, а.а Ц.Чинзориг нараар манлайлуулсан хүчит 64 бөх зодоглон барилдав.
Барилдааны хоёрын даваанд у.н А.Батмөнхийн аманд таарсан Баянхонгор аймгийн Галуут сумын харьяат з.б П.Баянжаргал эвгүй барилдаантай бөх гэдгээ нотлож начныг дөрвөн хөллүүлээд босгов. Гэсэн ч залуу начин хараатай хөдлөж татаж хавирахад нь дагуулж тахимдаад давав. Сэлэнгэ аймгийн Мандал сумын харьяат, өнөө жил аймагтаа дөрөв давсан с.з Э.Батхуяг а.н Г.Пүрэвдоржийг дүүгүүрдэж эргүүлэнгүүт угсруулж давхар тохоод хаясан нь бяртай хүнд таарахуйц мэх харагдав. Өвөрхангай аймгийн харьяат с.з Г.Цэнддорж Төв аймгийн харьяат с.з Т.Олзбаатарыг өвдөг шороодуулж хоёр давлаа. Мөн чөлөөтийн 74-ийн шилдэг Завханы с.з Б.Анхбаяр Баянхонгорын Бөмбөгөрийн Г.Болднямд шуудагны барьцнаас унасан бол мөн чөлөөтийн сайчуулын нэг Увсын Б.Нямдорж с.з А.Батхүүгээр давав.
Гурвын даваанд у.н А.Батмөнх с.з С.Ганпүрэвийг хонгодож дээр цацаад, а.а Ё.Эрдэнэжаргал с.з С.Гал-Эрдэнийг хонгодоод, а.а Б.Батдорж с.з Э.Батхуягийг бярдаж голлож дайраад, а.х М.Мэндсайхан с.з Б.Нямдоржийг давхар хамаад, а.н Ц.Анхбаяр а.н Х.Мөнхбаярыг татаж хавираад давсан бол тунасан заануудын барилдаанд Өвөрхангайн Бүрдний Г.Цэнддорж давлаа.
Оноолтын даваанд а.а Б.Батдорж мушгиад, а.н Ц.Анхбаяр а.а Ё.Эрдэнэжаргалыг хонгодоод, а.а Ц.Чинзориг а.х Б.Лхагва-Очирыг суганд сэжиж түрээд тус тус давав.
Их шөвөгт зүүн барууны магнай бөхчүүд учраагаа тун төвөггүй давсан бол үзүүр түрүүний барилдаан ч мөн удаж төдсөнгүй арсланг давуулах гэхэд сөрж хавираад улмаар мушгиад начин давж түрүү бөхөөр тодорлоо.
Энэ барилдаанд Харганат цамхаг группийн харьяаны бөхчүүд болоод тус группийн нэрийн өмнөөс тэмцээн уралдаанд оролцдог бөхчүүд барилдсан юм. Мөн харуул хамгаалалтын залуус нь гарч барилдлаа.
Нэг байгууллагын барилдаан боловч үзэгч олонтой, зохион байгуулалт бай шагнал өндөртэй сайхан барилдаан боллоо. Барилдааны бөхийн тайлбарлагчаар МУСТА, үндэсний бөхийн ахлах тайлбарлагч Ц.Батнасан, засуулаар Монгол улсын тонж манлай засуул Д.Цогзол, улсын ахлах засуул Р.Сампилдондов, улсын засуул Л.Чойжамц, улсын засуул Э.Баярбат нар ажиллав.
Оноолтыг 3-ын даваанаас үзнэ үү.
Гурвын даваа
1. У.н А.Батмөнх – С.Ганпүрэв с.з
2. А.а Ё.Эрдэнэжаргал – С.Гал-Эрдэнэ с.з
3. А.а Б.Батдорж – Э.Батхуяг с.з
4. А.а Ц.Чинзориг – Г.Болдням с.з
5. Б.Лхагва-Очир а.х – Т.Түвшинтулга а.х
6. М.Мэндсайхан а.х – Б.Нямдорж с.з
7. Х.Мөнхбаяр а.н – Ц.Анхбаяр а.н
8. Ж.Лхагвасүрэн с.з – Г.Цэнддорж с.з
Дөрвийн даваа
1. У.н А.Батмөнх - Г.Цэнддорж с.з
2. А.а Ё.Эрдэнэжаргал - Ц.Анхбаяр а.н
3. А.а Б.Батдорж - М.Мэндсайхан а.х
4. А.а Ц.Чинзориг - Б.Лхагва-Очир а.х
Тавын даваа
1. У.н А.Батмөнх - Ц.Анхбаяр а.н
2. А.а Б.Батдорж - Ц.Чинзориг а.а
Зургаагийн даваа
1. У.н А.Батмөнх - А.а Б.Батдорж
МУИС-ийн оюутан Т.Түмэндэмбэрэл