Хурдан хүлгэдийн цолыг олголоо

ММСУХ-ны тэргүүлэгчдийн 2013 оны 11-р сарын 25 ны өдрийн хуралдааны тогтоолын дагуу улс, бүс, "Их хурд" уралдаануудад амжилттай наадсан шандаст хүлгэдэд цол олголоо. ММСУХ-ны “Хурдан моринд цол олгох” журмыг үндэслэн ММСУХ-ны Тэргүүлэгчдийн хурлын 2013 оны 11 дүгээр сарын 25-ны 13/19 тоот шийдвэрээр Үндэсний их баяр наадамд гурван жил дараалан түрүүлсэн, Монголын шигшмэл хурдан морьдыг шалгаруулах “Их хурд-VI”  уралдаанд түрүүлж  наадамчин олноо баясган “Хурдан моринд цол олгох” журмын болзлыг биелүүлсэн Өмнөговь аймгийн Цогтцэций сумын уугуул, Тод манлай уяач  Дашдэмбэрэлийн Бат-Эрдэнийн “Улс” халзан азарганд  “Дархан Манлай түмний эх” цол, алтан гэрэгэ, цацагт шар торгон жолоо,  Үндэсний их баяр наадамд хоёр жил дараалан түрүүлсэн, Монголын шигшмэл хурдан морьдыг шалгаруулах “Их хурд-VI”  уралдаанд түрүүлж, наадамчин олноо баясган “Хурдан моринд цол” олгох журмын болзлыг биелүүлсэн Говь-Алтай аймгийн Шарга сумын уугуул, Тод манлай уяач Хадбаасангийн Бат-Эрдэнийн хүрэн моринд  “Даян Манлай түмний эх” цол, алтан гэрэгэ, цацагт шар торгон жолоог олгохоор шийдвэрлэсний дагуу 1-р сарын 29-нд төрийн ордонд гардууллаа. Мөн энэ үеэр бага дөрвөн насандаа төрийн наадамд нэг түрүүлж, гурав айрагдсан Д.Болдбаатарын хээр үрээний  Эрхэм төрийн идэр түмний эх цолыг олгосон юм.
А.Тэлмэн