Эрдэнэт хотод болсон барилдаан

Орхон аймгийн төв Эрдэнэт хотноо аймаг цэргийн цолтой хүчит бөхийн барилдаан болж а.а Д.Амарсайхан, а.а Б.Уртбаяр, а.а Т.Чулуунгэрэл, а.а С.Лхагвабаатар нараар манлайлуулсан хүчит 64 бөх барилдав. Барилдааны чанар чансаа тун сайн болсон бөгөөд а.з Б.Болдбаатар, а.н О.Мөнх-Ирээдүй нар нэгийн даваанд өвдөглөжээ. Бөхийн барилдааны гурвын даваанд с.з Б.Хосбаяр а.а С.Лхагвабаатарыг, а.н Б.Түмэнбаатар а.з Ж.Дагва-Очирыг тус тус өвдөглүүлсэн бол а.н Ц.Ганбат с.з Ч.Мөнхбаттай тунан барилдаж давсан байна.
Хүчит бөхийн барилдааны дөрвийн даваанд а.а Д.Амарсайхан с.з Б.Хосбаярыг зайлаад, а.а Т.Чулуунгэрэл а.н Б.Түмэнбаатарын хөлд ороод, а.а Б.Уртбаяр а.н Ц.Ганбат дан шуудагны барьцнаас шахаж татаад орхив.
Тавын давааны барилдаанууд дан золгооноос шийдэгдсэн байна. А.а Д.Амарсайхан а.а Т.Чулуунгэрэлийг амлаж зайлж мушгиад өвдөг шороодуулсан бол өнгөрсөн жилийн аймгийн наадмын үзүүр түрүүний бөхчүүд тунан барилдаж шахаж татаад тулгуур хөлд мордоод түрүү бөх ахин давсан байна.
Түрүү үзүүрт а.а Д.Амарсайхан а.а Б.Уртбаяр нар барилдаж Б.Уртбаяр шахаж татаж хавираад давснаар түрүү бөхөөр тодорчээ.
Ийнхүү Эрдэнэт хотноо болсон оны эхний барилдаанд Завхан аймгийн Завханмандал сумын харьяат, өнгөрсөн жилийн Орхон аймгийн баяр наадмын түрүү бөх, аймгийн арслан Батцэрэнгийн Уртбаяр түрүүлж Булган аймгийн Сэлэнгэ сумын харьяат, Булган аймгийн арслан Дэлгэрсайханы Амарсайхан үзүүр булаажээ. Их шөвөгт 2012 оны Орхон аймгийн наадмын түрүү бөх, Өвөрхангай аймгийн Есөнзүйл сумын уугуул, а.а В.Тавхайн хүү, аймгийн арслан Чулуунгэрэл, өнгөрсөн жилийн үзүүр бөх, Булган аймгийн Сэлэнгэ сумын харьяат, аймгийн заан Батсүхийн Гантөмөр нар шалгарчээ.
Үзүүрт үлдсэн хоёр арслан өнгөрсөн намар хоёр ч барилдаанд учраа таарч 1:1-ийн харьцаатай байсан бол энэ удаад Уртбаяр арслан давснаар тооны харьцаа 2:1 болов.
Оноог дөрвийн даваанаас үзнэ үү.
Дөрвийн даваа
1. Д.Амарсайхан а.а – Б.Хосбаяр с.з
2. Т.Чулуунгэрэл а.а – Б.Түмэнбаатар а.н
3. Б.Уртбаяр а.а – Ц.Ганбат а.н
4. Б.Гантөмөр а.з – Д.Золбаяр а.з
Тавын даваа
1. Д.Амарсайхан а.а – Т.Чулуунгэрэл а.а
2. Б.Уртбаяр а.а – Б.Гантөмөр а.з
Зургаагийн даваа
1. Д.Амарсайхан а.а – Б.Уртбаяр а.а

Мэдээллийг Х.Сабит /Эрдэнэт хот/