МУ-ын Манлай уяач Б.Бат-Өлзий: Энэ жил хамгийн сайхнаараа наадсан

Энэ жилийн наадмын  "гар нийлсэн хамтрагчид" бол Тод манлай уяач Х.Бат-Эрдэнэ, Манлай уяач Б.Бат-Өлзий нар байлаа. Өнгөрсөн жил хоёр түрүү, 11 айргийн амжилтаараа оны шилдэг уяач болж байсан Манлай энэ жил 6 түрүү, 9 айргийг хүртээд байгаа юм. Ингээд Дугараа уяачтай цөөн хором хөөрөлдсөнөө хүргэж байна.
-Дугараа Манлай энэ жил төлөвлөгөөгөө 100 хувь давуулан биелүүлсэн болов уу?
-Тэглээ. Хамгийн сайхнаараа наадлаа. Морь уясан 20 гаруй жилийн хөдөлмөрийнхөө үр шимийг хүртэж байна. Энэ хугацаанд хамгийн олон айраг түрүүтэй наадсан нь энэ жил боллоо. Эрлийзэд манайхаас гурван адуу орсон байгаа.
-Шинэ цагийн монгол адуугаа ялгаж уралддаг болоод багагүй хугацаа өнгөрлөө. Энд та ямар бодолтой явдаг вэ?
-Би буруу л гэж боддог. Энэ нь баяжиж болохгүй гэснээс ялгаагүй юм бишүү. Энэ бол морины түүхэн хөгжилд хэлмэгдүүлэлтийн он жил болж байна. Мөнх-Эрдэнэ гавьяатыг харын эрлийз гээд “зодолдуулахгүй” байвал ямар вэ. Тэрэнтэй л адилхан шүү дээ. Гэтэл дэлхийн аль ч улс гүрэнд адуугаа сайжруулах ажлыг хийсээр л ирсэн. Одоо ч хийж байна. Адуугаа сайжруулсан нь улсад, монгол адуутай нь аймаг сумандаа наадъя л даа. Яагаад хуучин цаг шиг нэг түвшинд амьдрах ёстой гэж. Өнөөдрийн нийгэмд хэн чадаж байгаа нь л амжилт олж амьдрал ахуйгаа дээшлүүлж байгаа биз дээ. Адуугаа сайжруулж байна гэдэг чинь тэр хүн хөдөлмөрлөж байнаа л гэсэн үг. Ер нь бүх ололт амжилт хөдөлмөрийн үр шим байдаг юм.
-Тод манлайн болзлыг давуулан биелүүлчихлээ, тийм ээ?
-Тэрийг ёстой мэдэхгүй юм. Хууль дүрмээрээ уясан нь авдаггүй биз дээ.
-Ярилцсанд баярлалаа.

А.Дөл