Энэ өдрүүдэд болох барилдаанууд

Аравдугаар сарын 18-н буюу өнөөдөр Сайншанд хотод Хан Баянзүрх уулын тахилга наадам болох юм байна. Харин маргааш буюу аравдугаар сарын 19-ны өдөр Замын-Үүд хотод Замын-Үүдийн гаалийн 90 жилийн ойн барилдаан болно. Энэ барилдаануудад улс аймгийн алдар цолтой бөхчүүд зодоглоно. 19-ний бямба гарагт Шинжлэх Ухаан Технологийн Их Сургуулийн “Соёмбо” клубээс зохион байгуулж буй намар цагийн нээлт Үндэсний бөхийн барилдаан болох бөгөөд барилдаанд сумын цолтой болон залуу бөхчүүд барилдана. Барилдаан ШУТИС-ийн төв байрны Спорт зааланд 19-ний 14.00 цагаас болох ба бөхчүүдийг цаг баримтлахыг анхааруулсан байна. Барилдах бөхчүүд барилдаан эхлэхээс өмнө цолны үнэмлэх, бүртгэлийн хураамж 3000 мянган төгрөгтэй ирж бүртгүүлэх юм байна. Мөн 19-ний бямба гарагт Монгол Бөхийн Өргөөнд нийтийн монгол бөх болоод өсвөр үеийн барилдаан болно. Өсвөр үеийнхний барилдаанд 1997 оноос хойш төрсөн хөвгүүд барилдах бол нийтийн монгол бөхийн барилдаанд бөхийн болоод бусад спортын төрлөөр тусгайлан хичээллэдэггүй, барилдах дур сонирхолтой, өмсгөл бүрэн "шандастнууд" зодоглоно. 20-ны ням гарагт Төв аймгийн нэрэмжит АЦЦБЗБ барилдаан Монгол Бөхийн Өргөөнд болно. Энэ нь аймаг цэргийн цолтны намар цагийн нээлтийн барилдаан бөгөөд барилдааны үеэр МҮБХ-оос санаачлан гаргасан “Монгол бөхийн нэвтэрхий толь”-ийн нээлтийн ёслол болно.

МУИС-ийн оюутан Т.Түмэндэмбэрэл