Хоёр түрүү, хоёр айргийн эзэн Тэргүүн хонгор

"Амны  билгээс ашдын билэг" хэмээн ерөөл өргөж ирсэн буурал дээдсийн буянт сургаалийн биелэл болж, нэр шигээ хурдалж байгаа ажнай бол Дундговь аймгийн Хулд сумын уугуул, аймгийн Алдарт уяач Чоймболын Дэмчигцоодолын Тэргүүн хонгор үрээ юм. Улс, бүсийн наадамд хоёр түрүүлж, хоёр айрагдаад байгаа хонгор үрээ Сүхбаатар аймгийн Халзан сумын уугуул Батжаргалын Чулуунбатын унаган адуу. Чулуунбатын өвөө сумын Алдарт уяач Цэрэнбалтав тэрэгний морио уяж Халзан сумынхаа 60 жилийн ойд түрүүлгэж байсан эрдэмт уяач. Сумынхаа наадамд нэг түрүүлж, хэд хэд айрагдсан тэрхүү хонгор морийг Халзанчууд андахгүй бөгөөд өдгөө ч Цэрэнбалтавын “Тэрэгэн хонгор” хэмээн дурсаж байдаг.
Ч.Батжаргал хурдан хонгор азарганых нь төл, зээрд гүүнийх нь /Сүхбаатар аймгийн Уулбаян сумын уугуул Бат-Эрдэнийн унаган зээрд гүү/ унага хонгор үрээндээ өвөөгийнхөө хонгор шиг хурдан ажнай болохыг бэлгэдэн "Тэрэгэн хонгор" хэмээх нэрийг хайрлаж, хурдан хүлгийн хийморьт сүсэлж явдаг, санаа зорилго нэгтэй анддаа /Д.Эрболдод/ 2011 онд дааганд нь өгчээ.
Шинэ эзэндаа очсон цагаас эхлэн цойлон хурдалсан хонгор үрээ морь сонирхогчдын эчнээ танил болж, “Тэрэгэн” хэмээх нэр нь  явсаар “Тэргүүн хонгор” болж хэвшсэн гэдэг.
2011 онд даагандаа:
МУ-ын Манлай уяач Д.Бат-Эрдэнийн "Молор эрдэнэ"-ийн мялаалга наадамд айргийн тав, Өмнөговь аймгийн 80 жилийн ойд айргийн гурав, “Говьшанхын хурд 4” уралдаанд айргийн гурав, “Энержи ресус” ХК-ний нэрэмжит уралдаанд түрүү
2012 онд шүдлэндээ:
“Их мандал 2012” говийн бүсийн уралдаанд түрүү
Өвөрхангай аймгийн Есөнзүйл сумын 80 жилийн ойд түрүү
2013 онд хязааландаа:
Дундговь аймгийн хаврын бүсийн уралдаанд соёолон насанд түрүү
АХ-ын 92 жилийн ой, Үндэсний их баяр наадмын аман хүзүү
Завхан аймгийн 90 жил, хангайн бүсийн уралдааны түрүү магнайд тус тус хурдлаад буй энэ цагийн эрэмгий хурдан буянгуудын нэг билээ.
Морины хорхойтнуудын харааг булаасан энэхүү хурдан буянг худалдан авах санал нэг бус удаа ирж байсан ч аав хүү Алдартууд татгалзсан хариу өгсөн хэмээдэг.

А.Тэлмэн