Урианхай харвааны шилдгүүдийг зургаан сая төгрөгөөр “байлна”

“Үндэсний спортыг хөгжүүлэх” хөтөлбөрийг хэрэгжүүлэх зорилгоор сурын харвааны зан үйл, ёс заншлыг өсвөр үеийнхэнд өвлүүлэх, улс даяар сурталчлан таниулж хөгжүүлэх зорилготой урианхай сурын харвааны улсын Аварга шалгаруулах тэмцээн өнөөдрөөс 28-ныг хүртэл гурван өдөр сур харвааны талбайд болно. Одоогийн байдлаар Баян-Өлгий, Ховд, Сэлэнгэ, Хэнтийн баг тамирчид оролцохоор мэдүүлгээ өгөөд байгаа бөгөөд оролцсон харваачид спортын зэрэг цол хүртэж амжилтаа ахиулах боломжтой юм. Тэмцээн цуваа болон багийн харвааны төрлөөр явагдах ба баг нь 10 харваачтай байна. Багийн болон цуваа харваа, ахмадын улсын аварга шалгаруулах тэмцээний шилдгүүдийг өргөмжлөл, медаль, мөнгөн шагналаар урамшуулах ажээ. Энд сонирхуулахад багийн харвааны нэгдүгээр байр нь 1,8 сая, цуваа харвааны “түрүү магнай” 600 мянга, ахмадын харвааны 1-5 байрт нийт 370 мянган төгрөгийг төсөвлөөд байгаа ажээ. Өөрөөр хэлбэл шилдгүүдийг  таван байр эзлүүлж, зургаан сая төгрөгөөр “байлж” байгаа гэнэ. Харвааны шилдгүүд 28-ны ням гарагт тодорно.
Нэмж тэмдэглэхэд эр хүний наадгай гэгддэг урианхай сураар төрийн баяр наадмын сурын харваа эхэлдэг уламжлалтай. Энэ жилийн баяр наадмаар монгол орны өнцөг булан бүрээс ирсэн 160 гаруй харваач цэц мэргээ сорьж, 15 спортын мастер, 6 дэд мастер төрсөн юм. Үүнээс Ховд аймгийн Мөнххаан сумын уугуул, “Ховд Мөнхтүшиг” компанийн харваач Цэвээндоржийн Батзориг, “Монгол ус” төрийн өмчит улсын үйлдвэрийн харваач Батаагийн Баярсайхан, “Алдар” спорт хороо, “Жем интернэйшнл” компанийн харваач Дамбын Мөнхгэрэл, Баян-Өлгий аймгийн Буянт сумын уугуул, “Монбэт” компанийн харваач Баастын Мөнхтөр, Баян-Өлгий аймгийн Буянт сумын уугуул Батчулууны Баярхүү нар эхний таван байрыг эзэлж байлаа.

П.Ундраа