Халхголчууд мялаалга наадмаа хийв

         Монгол орны алс зүүн хязгаарт туурга тусгаар улсынхаа баталгаа болон аж төрөн буй Дорнод аймгийн Халхгол сумын ард иргэд маань могой жилийн босгон дээр Монголын Морин спорт, Уяачдын холбооны /ММСУХ/ сумын Шилдэг салбар холбоогоор шалгарсан “ Халхын То ван “ МСУХ-ны мялаалга наадам, Ялалт багийн өдөрлөгийг хамтатган энэ сарын 14, 15-ны намрын налгар өдөр Буйр далай ээжийнхээ хөвөөн дээр тэмдэглэв.
          Тус сумын малчид өнгөрөгч өвөл байгалийн зудтай нүүр тулан 20 гаран мянган малаа алдсан ч мялаалга наадам, багийнхаа өдөрлөгтөө шинэхэн дээлээ өмсөж, ижил зүсмийн мориор хослон баяраа чимжээ. Мялаалгын баярт УИХ-н гишүүн Х.Болорчулуун гишүүн хүрэлцэн ирж сумын иргэд,малчидад  хүндэтгэл үзүүлж, сумын засаг дарга В.Мөнх-тайван, засаг даргын орлогч Л.Энх-амгалан, Ялалт багийн засаг дарга Д.Пүрэвсүрэн, сумын МСУХ-ны тэргүүн А.Хүрэл-баатар нарын тэргүүтэй удирдлагууд баяр наадмыг нээн үг хэлж, багийн дунд сургуулийн авьяаслаг сурагчид ая дууны мэндчилгээ дэвшүүлэн, яруу найрагч Б.Мөнгөн-туул шүлэг найргаа өргөлөө. Баярын үеэр сумын ЗД-н захирамжын дагуу архи согтууруулах ундаа борлуулахыг түр хориглож, мотоциклийн хөдөлгөөнийг тодорхой хэсэгт хязгаарласан байна. Мөн МҮОНТ-н 4-р нэгдлийн редактор, ММСУХ-ны Тэргүүлэгч  Л.Цагаандалай, сурвалжлагч Д.Батжаргал нар хүрэлцэн ирж Мэнэн, Сүмбэрийн ХЦ-н дугаар ангийн байлдагч болон тус аймгийн 30 залуус оролцсон “Адуучин” нэвтрүүлэг зохион явуулснаас Матад сумын адуучин Г.Баяржаргал түрүүлж, Мэнэнгийн ХЦ-н дугаар ангийн байлдагч О.Будсүрэн , Чойбалсан сумын Б.Үнэнбат, Халхгол сумын Ж.Батдорж, М.Мөнгөнхүү нарын адуучид удаах байрт шалгарлаа.
          Халхголчууд 2013 оны аймгийн баяр наадмын хүчит бөхийн барилдаанаас шинэ харцага, хурц арслан төрүүлж сайхан наадсны зэрэгцээ хурдан морины уралдаанд ААУ Ж.Занданбалын хүү З.Хилийнхүүгийн загалт хул үрээ түрүүлж, СУА Д.Лхагвасүрэнгийн хүү Л.Алтангэрэлийн Имт хонгор морь их насанд аман хүзүүдэж, улмаар Хэнтий аймаг байгуулагдсны 90 жил, Зүүн бүсийн хурд наадамд дахин аман хүзүүдэж ММСУХ-ны Шилдэг цолоо баталж наадацгаасан билээ.
          Мялаалга наадамд хүчит 32 бөх барилдаж аймгийн арслан Г.Баатар түрүүлж, аймгийн харцага Э.Мөнхзориг үзүүрлэлээ. Хурдан морины уралдаанд шүдлэн 47, даага 38 уралджээ.

          Шүдлэн:
1. Халхгол сум Ялалт баг З.Хилийнхүүгийн загалт хул үрээ
2. Халхгол сум Ялалт баг ААУ Ц.Энхжаргалын хээр
3. Халхгол сум Ялалт баг Ж.Гантулгын хул буудан
4. Баянтүмэн сум О.Гантулгын саарал
5. Халхгол сум Ялалт баг СУА Г.Нямжаргалын хүрэн
           Даага:
1. Халхгол сум Ялалт баг З.Хилийнхүүгийн хонгор
2. Халхгол сум Цогтсүмбэр баг П.Амаржаргалын буудан  
3. Чойбалсан сум Х.Болоржаргалын хул буудан
4.  Халхгол сум Ялалт баг Б.Батболдын хүрэн
5. Халхгол сум Ялалт баг Б.Энхдолгионы хүрэн халзан даага тус хурдалжээ. Уралдаанд нас тус бүрт 20 хүртэл байлсан бөгөөд түрүүлж айрагдсан 10 морьдын эздэд УИХ-н эрхэм гишүүн Х.Болорчулуун мөнгөлсөн Монгол азарганы дүр бүхий дурсгалын зүйлс гардууллаа. Баяр наадмын үеэр А.Тунгалагтуул захиралтай Мобикомын Дорнод аймгийн салбараас Ялалт багийн дунд сургуулийн сурагч хурдан морь унаач 20 хүүхдэд  тус бүрт тосон бал, мөн 1 сар өөрийн дотны 2 дугаартай хязгааргүй ярих эрх бүхий 9471-ээр эхэлсэн дугаарыг бэлэглэв. Мөн Аймгийн МСУХ-ны дэд тэргүүн Ж.Сүхбаатар тус сумын Ялалт багийн харьяат СУА Ц.Энхжаргалд “Аймгийн Алдарт уяач” цолны батламжийг гардуулан, их насны хонгор морио унаж “Зүүн бүсийн хурд”-д аман хүзүүдсэн унаач хүү Г.Болоржаргалыг ОУ-н хүүхдийн “Найрамдал” зусланд амрах эрхийн бичгээр шагнав.  Мялаалга наадам, багийн өдөрлөгийг амжилттай болоход сайхан сэтгэлээрээ хандив өргөж туслалцаа үзүүлсэн байгууллага, иргэд, Халхгол сумын малчид түмэндээ талархал илэрхийлж байна.

Аймгийн МСУХ-ны НБДарга Хатагин Б.Батсайхан