Спортын мастер Л.Мөнхөө: Өөрийнхөө хийсэн нумаар 290 метр харваж рекорд тогтоолоо

Өнгөрсөн  ням гарагт Өлзийт хорооллын морин харвааны талбайд Монголын уламжлалт харваачдын холбоо, Морьт харваачдын холбоо хамтран намрын харвуул тэмцээнийг зохион явуулсан юм. Энэхүү тэмцээнд 4 багийн 20 гаруй тамирчид 7 төрлөөр цэц мэргээ сорьж, холч харвааны төрөлд спортын мастер Л.Мөнхөө, Ц.Туваанжав нар тэргүүлсэн тухай мэдээлсэн билээ. Харин энэ удаад бид Л.Мөнхөөтэй  цөөн хором ярилцсанаа хүргэж байна.
-Өнөөдөр хамгийн хол харвалаа. Та өөрийгөө манай уншигчдад танилцуулна уу?
-“Тод магнай”-н уншигчдад энэ өдрийн мэндийг хүргэе. Намайг Мөнхөө гэдэг. Би уламжлалт харваачдын холбооны тэргүүлэгчээр ажилладаг. Өнөөдрийн арга хэмжээ маш сайхан боллоо. Манай холбооноос гурав дахь удаагаа холч харвааны тэмцээнийг зохион байгуулж байна. Миний хувьд өнөөдөр 290 метр харваж түрүүлсэн дээ баяртай байна.
-Өмнө нь ямар харваачид хэдэн метр харваж рекорд тогтоож байсан юм бол?
-Анхны тэмцээнд уламжлалт харваачдын холбооны тэргүүн Александр 310 метр харваж түрүүлж байсан. Хоёр дахь нь спортын мастер Ёндон байгаа юм. 
-Энэ удаад хүчтэй өрсөлдөгчид олон байв уу?
-Тэр энэ нь гэж онцлох аргагүй, бүгд жигдхэн байлаа.
-Сурын спортоор хичээллээд удаж байна уу?
-Би 2006 оноос харваж байна. Үүнээс үндэсний сурын харваагаар 2008 оноос, зэвтэй харваа буюу уламжлалт харваагаар 2006 оноос харваж байна. Спортын мастер цолтой. Энэ жил Үндэсний сурын харвааны холбооноос холч харвааны тэмцээнийг зохион явуулж би 286 метр харваж бас түрүүлсэн.
-Энд ямар "нууц" байна вэ?
-Сум шувтан нарийн, холыг зүсэх зориулалттай. Бас нумны онцлог байна. Миний харваж байгаа нум бол тэртээ 13-р зууны үед харваж байсан жижиг богино гичиртэй. 13-р зууны үеийн нумны эх загварыг түүхийн эх сурвалжуудаас харж би өөрөө сэргээн хийсэн юм.
-Таны дээл хувцас бас анхаарал татаж байна?
-Манай уламжлалт харвааны холбооны гол зорилго энэ л дээ. Бидний өвөг дээдэс хүчирхэг байх үедээ ямар дээл хувцас өмсөж байсан юм. Ямар ёс жудагтай байв. Ямар ямар харвааг зохион байгуулдаг байв. Энэ бүгдийн талаар судалгаа хийж, тухайн үеийнхээ дээл хувцсыг иж бүрнээр нь өмсөөд сумаа саадагтаа, нумаа хоромсогтоо хийгээд харвадаг байя гэж 2010 онд холбоогоо байгуулж байлаа. Өнгөрсөн хоёр жилийн хугацаанд өөрсдөө сурталчлаад дээл хувцсаа өмсөөд ирэхээр хүмүүс ч мэддэг болж байгаад баярладаг.

 П.Ундраа