Э.Тамирын хүрэн халзан

АХ-ын 88 жилийн ойн баяр наадамд Ардчилал хүрэн даагаа түрүүлгэж байсан Ховд аймгийн Буянт сумын уугуул, Эрдэнэ-Очирын Тамирын хүрэн халзан азарга Их монгол улсаа тунхагласны 807 жилийн ойн баяр наадамд наймд хурдаллаа. Энэ хавар Хэнтий аймгийн Сэцэнханы хурдад айргийн дөрвөөр давхисан халзан азарга Сүхбаатар аймгийн Асгат сумын уугуул, сумын Алдарт уяач Юрагийн Наранбадрахын унаган адуу. Хүрэн халзангийн эцэг хар азарга нь Сүхбаатар, Асгат сумдын наадамд олон айрагдаж түрүүлсэн Ядамжавын халиуны угшилтай. Харин эх хүрэн гүү нь Наран сумын уугуул Цэрэнжавын адууны угшилтай гэдэг. Халзан үрээ даагандаа уягдалгүй өнжиж, шүдлэндээ Дорнод аймгийн баяр наадамд дөрвөөр давхиж, хязааландаа Дорнод аймаг байгуулагдсаны 80 жилийн ойд мөн л дөрвөөр хурдалж, Хөлөнбуйр сумын наадамд түрүүлж байжээ. Харин соёолондоо Сүхбаатар сумын наадамд түрүүлж, улсын наадамд 40-өөр давхиж байсан гэдэг. Энэ жилийн хавчиг азаргыг одоогийн эзэн Э.Тамир нь өнгөрсөн нэгдүгээр сард 60 сая төгрөгөөр худалдан авчээ. Дашрамд сонирхуулахад хүрэн халзан азаргатай  эцэг эх нэгтэй хүрэн хязаалан өнгөрсөн жил шүдлэндээ улсын наадамд 24-өөр давхиж байсан бөгөөд өдгөө Ю.Наранбадрах Алдарт уяа сойлгыг нь тааруулж байна.

А.Мөнх