Эзнээ ирлэж омогшуулсан энэ цагийн хурдан буян

Хэд хэдэн эзний гар дамжсан учраас Т.Галбадрахын ногоон соёолонгийн угшил гарвалыг яг таг тогтоох ярвигтай. Гэхдээ эцэг тал нь Хэнтий зүгийнх харин эх тал нь Дорнодын Цагаан-Овоо сумынх хэмээн ярьдаг. Ногоон үрээ даагандаа улсын наадамд зургаалж, Булган аймгийн 60 жилийн ойд мөн л хамраараа тасдуулан зургаад давхиж байсан. Хэдийгээр наадамд одгүй байсан ч морь сонирхогчдын хараанд өртөж, АХ-ын 88 жилийн ойн баяр наадмын өмнөхөн одоогийн эзэндээ иржээ.
АХ-ын 88 жилийн ойн баяр наадмаар хүрэн халзан үрээгээ айрагдуулсан “Чандмань тал” ХХК-ны захирал Энхболдод чамгүй өндөр ханш төлж ногоон соёолонгоо Галбадрахын хэмээн цоллуулах эрхтэй болсон гэдэг.
Ногоон соёолон эзнийхээ урмыг хугалсангүй “Зоос бор”, “Тугал ухаа” зэрэг энэ цагийн хурдан хүлгүүдтэй шандас сорин зуузай холбон давхисаар   айргийн дөрөвт хурдалсан юм. Ногоон үрээний амжилт үүгээр дууссангүй.
“Очирваанийн хурд-2009 ” баруун бүсийн уралдаанд  алдарт “ Зоос бор ”-той зуузай холбосоор аман хүзүүнд хурдалж энгүй хурдан буян гэдгээ наадамчин олондоо харуулсан юм. Өдгөө ногоон соёолонгийн уяа сойлгыг МУ-ын Манлай уяач С.Ганхуяг тааруулж байгаа. Бие жижигтэй учир их хөнгөхөн давхилтай. Гараа тийм сайн биш ч араас нэхэж уралддаг онцлогтой. Давхар уяанд ир ордог нь Очирваанийн хурд наадмын үеэр батлагдсан. Эзнээ ирлэж омогшуулсан энэ цагийн хурдан буянгийн нэг Т.Галбадрахын ногоон үрээний талаар товчхон танилцуулахад ийм байна.