Шилдэг унаач А.Алтанхуяг: Эмээгийн соёолонг ах уяж, би унаж, анх удаа улсын наадамд уралдаж байлаа

“Унаган хурд” галын унаач А.Алтанхуяг улс бүсийн наадмын 3 түрүү, хоёр айргийн амжилтаараа шилдэг 9 унаачдын зургаадугаарт эрэмбэлэгдсэн юм.
-Шилдэг унаач болсон дүүдээ баяр хүргэе?
-Баярлалаа. 2012 оны шилдэг унаач болж байгаагаа Одгэрэл ахаасаа урьд өдөр нь сонсоод үнэхээр их баярласан. Маргааш нь шилдэг 9 унаач хүүхдийн хэддүгээрт эрэмбэлэгдсэн бол гэдгээ мэдэх гэж их яарсан шүү.

-Аль сургуулийн хэддүгээр ангид сурдаг вэ?
-Би Өлзийт хороололд амьдардаг. 59-р сургуулийн Зул багштай 7д ангид сурдаг.

-Хурдан морины унаач болоод хэр удаж байна вэ?
-Хурдан морь унаж сураа зургаан жил болж байна. Анх Буянбат ах маань морь унахыг зааж өгч байлаа. Түүнээс хойш  том жижиг олон уралдаанд оролцсон. Морь унаж сураад нэг жилийн дараа Алтанбулагт таньдаг ахынхаа хар азаргыг унаж уралдаад айргийн гурваар ирж байлаа. Үнэхээр их баярласан шүү, тэгэхэд.  Анхны гэдэг утгаараа үнэхээр их урам ордог юм билээ.

-Улс, бүсийн наадамд хэзээнээс эхлэн уралдаж байна вэ?
-Улсын наадамд анх 2010 онд уралдаж үзсэн. Тэгэхэд эмээгийн соёолонг том ах маань уяж, би унаж 100 дотор давхисан. Мэдээж улсын наадмын өндөр дов миний бодож байгаагаас ч босго өндөр байсан. Түүнээс хойш гурван жил дараалан улсын наадамд  уралдаж байна. Өнгөрсөн жилийн хувьд гурван түрүү, хоёр айргийн амжилтаараа шилдэг 9 унаачийн нэг боллоо. Дундговийн бүсэд Мөнгөншагайн буурал их морийг, Өвөрхангайн 9 зүйлийн даншигт Дайдийхүүгийн Баяраагийн хүрэн азаргыг унаж түрүүлгэсэн.  Үнэндээ тулгамдаад айраг түрүүгээ санахгүй л байна шүү.

-Мэдээж уралдааны замд бүгд өрсөлдөгч байх. Ширүүн өрсөлдөгч гэж байна уу?
-Тэгэлгүй бүгд өрсөлдөгчид. Яагаад ч юм заримдаа хэтэрхий үнэнч байх шиг санагдана гээч. Уралдаанаас бусад үед найзууд байж болно доо. Харамсалтай л тийм байдаггүй юмаа.

-“Унаган хурд” галын унаач хэзээ болсон бэ?
-Удаагүй ээ. Нэг жил л болж байна. Манай том ахын хүүхэд “Унаган хурд” галын унаач байгаа юм. Тэр ахаараа дамжуулж энэ галын нэг гишүүн болсон. Хүн бүр л дор бүрнээ хичээн, уралдах өдрөө тэсэн ядан хүлээж, айраг түрүү авчихаад баярлаж суух гоё байдаг юмаа. Өнөө хичээлээ сайн гэгч нь бэлдэж байгаад нүүр бардам багшдаа асуугдаж, өндөр үнэлгээ авахад цаанаа л амттай байдаг шиг ч юмуу.

-Том болоод ямар мэргэжилтэй хүн болох вэ?
-Мэдээж уяач шүү дээ. Хүүхдүүдийг харж байхад галынхаа том уяач нар шиг л мундаг уяач болохыг хүсдэг юм шигээ. Би ялгаагүй л дээ. Одгэрэл Манлай шиг л уяач болно доо.

-Удахгүй могой жил гарах гэж байна. Чиний хувьд ямар баярт дуртай вэ?
-Цагаан сараар уян дээрээ л байна даа. Ирж байгаа могой жилд  илүү их амжилт шүү гэж өөрөө өөртөө хэлсэн. Би хүүхдийн баяр, шинэ жил хоёрт их дуртай.  Амттанаар бялхсан өдрүүд болохоор тийм баяраас яаж татгалзах билээ.

П.Ундраа